Այսօր Շիրակի մարզի Մարմաշեն խոշորացված համայնքի Մայիսյան բնակավայրում Տերտերյանները տոնեցին իրենց բնակարանամուտը։ Եվրոհարդարված, գեղեցիկ առանձնատունը կառուցվել է հինգ ամսվա ընթացքում՝ պետական աջակցությամբ, «Ֆուլեր տնաշինական կենտրոն» բարեգործական հասարակական կազմակերպության միջոցով։ Այս ծրագրի ամբողջ առանձնահատկությունն այն է, որ բնակարանաշինությանը ներգրավված են հենց շահառու ընտանիքները։
Այսինքն՝ տվյալ ընտանիքի անդամները իրենց ձեռքերով կարող են կառուցել իրենց տունը, որի համար, սակայն, պետությունը վճարում է, գնահատում նրանց աշխատուժը։ Պետությունը միաժամանակ լուծում է տվյալ ընտանիքի անօթևանության և զբաղվածության հարցը։
Տերտերյանների տունը հինգ ամսում կառուցել էր նրանց բարեկամը, որն անչափ գոհ էր վճարումից։
Ինչպես կատակեցին բնակարանամուտը տոնելիս՝ «ջիգյարով» կառուցված տուն է։
Տարիներ շարունակ՝ 1993 թվականից նորակառույց տան հարևանությամբ տեղակայված տնակում բնակվող Տերտերյանների երկու որդիները Ռուսաստանի Դաշնությունում են, սակայն նորակառույց տուն ունենալուց հետո նրանցից մեկը վերադարձել է Հայաստան։
Կարդացեք նաև
«Սկզբում թերահավատ էինք, 2012 թվականից այս ծրագիրը կար, որ գյուղում պիտի տներ կառուցեն, անընդհատ հետաձգում էին։ Փառք Աստծո, որ վերջապես իրագործվեց»,- ասաց տանտիրուհին՝ Անահիտ Տերտերյանը։
Նրա հարսն էլ՝ Մելինե Խաչատրյանն, ասաց․ «Չէինք ուզում Հայաստան գալ տնակի պատճառով, մեզ հնարավորություն տրվեց վերադառնալ հայրենիք ու ապրել մեր երկրում։ Մենք Սոչիում էինք ապրում, իմ առաջին բալիկը պիտի ծնվի նորակառույց այս տանը, չորս տարի սպասել ենք երեխա ունենալուն»։
Նշենք, որ կառավարությունը երկրաշարժից անօթևան մնացած ընտանիքների բնակարանային խնդիրները լուծելու նպատակով Մայիսյան բնակավայրում բնակելի տան կառուցման միջոցով բնակարանային պայմանների բարելավման իրավունք է տվել 4 ընտանիքների:
Ծրագիրն իրագործվում է տարբեր գյուղական բնակավայրերում՝ Ջաջուռում, Շիրակում, Մարմաշենում, Բասենում, Սառնաղբյուրում, Գուսանագյուղում։
Ծրագրի ավարտը նախատեսված է 2021 թվականի դեկտեմբեր ամսին:
Ի դեպ, Մայիսյանում շուտով պատրաստ կլինի նաև մեկ այլ առանձնատուն, որը, սակայն, վերակառուցվում էր հին տան հիմքի վրա։
Նունե ԱՐԵՎՇԱՏՅԱՆ
Լուսանկարները՝ հեղինակի
