ԱԱԾ-ն ու ոստիկանության ծառայողները առավոտից խուզարկում են Սյունիքի մարզի Որոտան վարչական տարածքի ղեկավար Սուրեն Օհանջանյանի բնակարանը։ Թե ի՞նչ գործի շրջանակներում է խուզարկությունն իրականացվում, Սուրեն Օհանջանյանը չգիտի, բայց իրեն դատարանի որոշումն են ցույց տվել խուզարկության թույլտվության վերաբերյալ:
«Թուղթ են ման գալիս, ընտրությունների հետ կապված անօրինական գործարք-մործարքի կամ մի բանի, կաշառքի…անօրինական մի բան արած»,- Aravot.am-ի հետ զրույցում ասաց պարոն Օհանջանյանը:
Հարցին`կա՞ ընտրությունների հետ կապված անօրինական ինչ-որ մի բան, ինչը կասկածի հիմք է տվել, Սուրեն Օհանջանյանը պատասխանեց. «Չէ, չկա, ո՞նց կարա լինի: Չի եղել նման բան»:
Մեկ այլ հարցի`սա քաղաքական հետապնդում համարո՞ւմ եք, պարոն Օհանջանյանը պատասխանեց. «Հիմա չեմ կարող ձեր էդ հարցին պատասխանել»:
Կարդացեք նաև
Գորիսի քաղաքապետ Առուշ Առուշանյանն օրերս հայտարարել էր, որ տարբեր բնակավայրերի բնակիչներին իրավապահները կանչում են եւ փորձում իր դեմ ցուցմունք կորզել`սպառնալով Առուշանյանի դեմ ցուցմունք չտալու դեպքում իրենց դեմ քրեական գործեր հարուցել: Առուշ Առուշանյանը նաեւ ասել էր, որ Որոտան համայնքում բոլորին էին քննչական մարմինները հրավիրել հարցաքննության:
Սուրեն Օհանջանյանից հետաքրքրվեցինք`իրեն առաջարկե՞լ են Առուշ Առուշանյանի դեմ «գործ տալ»: «Չէ, նման բան չեն ասել»,- եղավ Օհանջանյանի պատասխանը:
Մեր զրույցի պահին խուզարկությունը դեռ շարունակվում էր:
Նելլի ԳՐԻԳՈՐՅԱՆ
