Դիլիջանում մեկնարկել է «Լեռնային Ղարաբաղի պատերազմից տուժած երիտասարդների տնտեսական կայունացում» ծրագիրը:
Ծրագիրը նպատակ ունի բարձրացնել ԼՂ հակամարտության արդյունքում տուժած ընտանիքների երիտասարդների տնտեսական հնարավորությունները՝ որակյալ կրթության, մասնագիտական դասընթացների մասնակցելու և ձեռնարկատիրական հմտություններ ձեռք բերելու միջոցով:
Ծրագրի համակարգող Մարիետա Աթաբեկյանը մեզ հետ զրույցում նշեց, որ ծրագրում՝ որպես թիրախային խումբ են ներառվել ԼՂ պատերազմից տուժած 17-35 տարեկան երիտասարդները, և շահառուներին ընտրելիս՝ առաջնահերթությունը կտրվի ռազմական գործողությունների մասնակիցներին, վիրավոր զինվորներին, պատերազմի մասնակիցների ընտանիքների երիտասարդներին, հակամարտության արդյունքում ԼՂ-ից Հայաստան տեղափոխված զինվորներին:
«Ծրագրի ընթացքում ակնկալում ենք մոտ 100 երիտասարդի տրամադրել նորարարական կրթություն, 70 երիտասարդի՝ մասնագիտական ուսուցում, 40 երիտասարդի՝ գործիքակազմ, իսկ 20 երիտասարդի՝ բիզնես հմտություններ, որոնցից 8 – ը կհաղթի մրցույթ և հնարավորություն կունենա ստանալ փոքր բիզնեսի համար մեկնարկային կապիտալ»,-տեղեկացրեց նա:
Կարդացեք նաև
Մարիետա Աթաբեկյանի փոխանցմամբ՝ ծրագրում համակարգված է, թե քանի տոկոս արցախցի և քանի տոկոս տեղացի բնակիչ պետք է ներգրավված լինի: Աթաբեկյանը տեղեկացրեց, որ ծրագիրը կիրականացվի ՍՕՍ Մանկական Գյուղեր ՀԲՀ-ի և «Ավրորա մարդասիրական նախաձեռնության» ֆինանսական աջակցությամբ։
Սաթենիկ ՀՈՎՍԵՓՅԱՆ
