Խորհրդարանական արտահերթ ընտրությունների արդյունքները անվավեր ճանաչելու որեւէ հիմք չկա: Այսօր այս մասին կառավարության նիստից հետո, լրագրողների հետ ճեպազրույցում, ասաց արդարադատության նախարարի պաշտոնակատար Ռուստամ Բադասյանը՝ նշելով, որ ՍԴ-ում ինքն է լինելու «Քաղաքացիական պայմանագիր» կուսակցության ներկայացուցիչը. «Մենք մի կարճ վարժություն կարող ենք անել, կարող ենք բացել ԵԱՀԿ/ԺՀՄԻԳ-ի նախնական եզրակացությունները, կարդալ, թե ինչ գնահատական է տրվում ընտրություններին եւ համեմատել 2017 թվականին կամ դրանից առաջ տեղի ունեցած ընտրությունների գնահատականների հետը: Այնտեղ կտեսնեք, թե ինչ էական տարբերություններ կան: Վերջին ընտրությունները եղել են ժողովրդավարության լավագույն չափանիշներին համապատասխանող: Անցել են արդար մրցապայքարում, բոլորն ունեցել են հնարավորություններ: Օրինակ՝ 2017-ի ընտրությունների գնահատականներում խոսվում է վարչական ռեսուրսի չարաշահման, ընտրություններին կողմնակի ազդեցությունների, այդ թվում ընտրատեղամասերում, մասին: Այս ընտրությունների նախնական գնահատականներում այդպիսի գնահատականներ չկան: Հակառակը, կան շատ դրական շեշտադրումներ: Կարծում եմ՝ այս ընտրությունների կապակցությամբ պետք է բոլորս իրար շնորհավորենք, որովհետեւ սա իշխանության ձեռքբերումը չի, ընդդիմության ձեռբերումը չի, սա բոլոր քաղաքացիների ձեռքբերումն է»:
Հարցին՝ որտեղ է գրված, որ ընդդիմադիր հայացքներ ունեցող համայնքապետերը պետք է հեռանան, արդարադատության նախարարի պաշտոնակատարը պատասխանեց՝ ոչ միայն Սահմանադրության մեջ, այլ նաեւ կառավարության որեւէ քաղաքականության մեջ նման բան չկա:
Ռուստամ Բադասյանից հետաքրքրվեցին նաեւ՝ Գեղարքունիքի մարզում ռուս սահմանապահներն ի՞նչ իրավական հիմքով են տեղակայվում: Նախարարի պաշտոնակատարն ասաց, որ նման գործընթացից տեղեկություն չունի:
Լուսինե ԲՈՒԴԱՂՅԱՆ
