«Երազանքների դատարանը բարեվարք, պրոֆեսիոնալ դատավորներից կազմված դատարանն է, որտեղ գործընթացներն արագ են տեղի ունենում եւ կա հանրային վստահություն դատական համակարգի նկատմամբ»,-այսօր կառավարության նիստից հետո պատասխանելով լրագրողների հարցերին՝ ասաց արդարադատության նախարարի պաշտոնակատար Ռուստամ Բադասյանը:
Հիշեցնենք, որ այսօր կառավարությունը համաձայնություն տվեց Բարձրագույն դատական խորհրդի՝ դատավորների թվակազմը 20 մասնագետով ավելացնելու վերաբերյալ առաջարկությանը։
Նիստում վարչապետի պաշտոնակատար Նիկոլ Փաշինյանն անդրադառնալով որոշմանն, ասել էր․ «Դատավորների թվակազմի ավելացումը մենք պետք է դիտարկենք նաեւ որպես դատական համակարգում բովանդակային բարեփոխումների միջոց։ Հույս ունեք, որ այս լրացումներով, համալրումներով մենք կուժեղացնենք դատական համակարգում առկա լավագույն փորձը, մյուս կողմից՝ թարմ հայացք, թարմ ուժեր կներգրավենք դատական համակարգ՝ ստանալով, ի վերջո, մեր երազանքների դատական համակարգը, որի որոշումները իրենց բնույթով կհամարվեն արդարության եւ արդարադատության մարմնավորում։ Սա ամենակարեւոր նպատակն է»։
Հարցին՝ թավշյա մանդատը պողպատե մանդատով փոխարինելու՝ Նիկոլ Փաշինյանի հայտարարությունից հետո, դատական բարեփոխումներն ի՞նչ ճանապարհով են տեղի ունենալու, Ռուստամ Բադասյանն ասաց, որ նախընտրական ծրագրում ուղղությունները նախանշված են. «Սկսած՝ սահմանադրական փոփոխություններից, վերջացրած կոնկրետ նախաձեռնություններից, որոնք արդեն ունենք: Կա հակակոռուպցիոն դատարանի փաթեթ եւ այլն»:
Կարդացեք նաև
Ռուստամ Բադասյանն ասաց, որ առաջին հերթին դատավոր դառնալու փակ շղթան պետք է կոտրվի. «Նոր դատավորներ պետք է, անպայման, հայտնվեն դատական համակարգում, համակարգի ներսից անընդհատ վերարտադրվելու այդ փակ շղթան՝ գալ դատական դեպարտամենտ, այդտեղից որոշ ժամանակ անց դառնալ դատավոր, ունենալ փոխկապակցվածություն դատական համակարգի ներսում, դա պետք է կոտրվի»:
Լուսինե ԲՈՒԴԱՂՅԱՆ
