«Էլեկտրոնային առողջապահության ազգային օպերատոր» ընկերությունը և վերջինիս կողմից սպասարկվող էլեկտրոնային առողջապահության ԱՐՄԵԴ համակարգը հեղինակավոր TÜV NORD CERT ընկերության կողմից սերտիֆիկացվել են միջազգային ISO/IEC 27001 ստանդարտով՝ դառնալով նման սերտիֆիկացում ունեցող եզակի ընկերություններից մեկը Հայաստանում:
TÜV NORD CERT ընկերությունն իր կողմից իրականացված աուդիտի, գնահատումների հիման վրա հաստատել է, որ «էլեկտրոնային առողջապահության ազգային օպերատոր» ընկերությունը էլեկտրոնային առողջապահության ԱՐՄԵԴ համակարգի կառավարումն իրականացնում է ISO/IEC 27001 պահանջներին համապատասխան:
ISO/IEC 27001 ստանդարտը վերաբերում է տվյալների պաշտպանության ոլորտում տեղեկատվության անվտանգությանը ու տեղեկատվական անվտանգության կառավարման համակարգերին և տրվում է դրանց ստեղծման, ներդրման, վերահսկողության ու շարունակական բարելավման ոլորտներում միջազգայնորեն հաստատված ստանդարտների պահպանման համար: Իսկ ISO 27001-ի և IEC-ի ստանդարտներով համատեղ սերտիֆիկացումը նշանակում է անվտանգության առավելագույն աստիճանի համապատասխանություն:
Սերտիֆիկատը տրվել է երեք տարի ժամկետով՝ էլեկտրոնային առողջապահության համակարգի տեղեկատվական տեխնոլոգիական ենթակառուցվածքների կառավարման, E-health հավելվածների աջակցության ու սպասարկման համար:
Կարդացեք նաև
«Նման բարձրակարգ միջազգային ստանդարտացում անցնելու համար մենք բավականին երկար ճանապարհ ենք անցել: Մեր ընկերության համար, որն իրականացնում է ԱՐՄԵԴ համակարգի տեխնիկական կառավարումն ու բարելավումը, ծրագրակազմի սպասարկումը, միջազգային կարգի այսպիսի սերտիֆիկացումը կարևոր էր: Այն հավաստագիր է, որը վկայում է բարձր որակի ծառայությունների մատուցման, միջազգային ստանդարտներին համապատասխան իրականացվող աշխատանքների մասին: Այս ստանդարտն ընդունելի է ողջ աշխարհում, որին համապատասխանում են միայն առաջատար ընկերությունները: Մենք ուրախ ենք, որ տեխնոլոգիական ոլորտի հայաստանյան կազմակերպությունները, հանձինս նաև մեր ընկերության, նույնպես ընդգրկվում են այդ ցանկում»,-ասում է «էլեկտրոնային առողջապահության ազգային օպերատոր» ընկերության գլխավոր տնօրեն Ավետ Մանուկյանը:
Տեղեկանք․ «Էլեկտրոնային առողջապահության ազգային օպերատոր» ՓԲԸ հանդիսանում է Հայաստանում էլեկտրոնային առողջապահության միասնական տեղեկատվական համակարգը կառավարող օպերատորը։ Համաձայն ՀՀ կառավարության հետ կնքված կոնցեսիոն պայմանագրի՝ ընկերությունն ապահովում է համակարգի տեխնիկական կառավարումը, բարելավումը, ծրագրակազմի սպասարկումը։
«Էլեկտրոնային առողջապահության ազգային օպերատոր» ՓԲ ընկերություն
