Ֆրանսիան ոչ միայն նորաձեւության, բույրի, այլև համի հայրենիքն է: Եվ պատահական չէ, որ դեռ 2010 թվականին ֆրանսիական խոհանոցը, կամ ճիշտ ձեւակերպմամբ՝ «ֆրանսիացիների գաստրոնոմիական ճաշը»՝ իր ողջ արարողակարգով, ընդգրկվել է ՅՈՒՆԵՍԿՕ-ի ոչ նյութական մշակութային ժառանգության ցանկում:
«Փարիզ բրեստի» նուրբ համը շատերն են վայելել, այն ֆրանսիական ամենահայտնի դեսերտներից է, հեղինակն էլ ֆրանսիացի հրուշակագործ Լուի Դյուրանդն է։
Այս նրբահամ դեսերտը Դյուրանդը ստեղծել է 1910 թ., անունն ընտրելիս էլ երկար չի տատանվել՝ «Փարիզ բրեստ», քանի որ այդ ժամանակ իր հրուշակարանի մոտակայքում անցկացվում էր Փարիզ-Բրեստ-Փարիզ ամենամյա հեծանվավազքը։
«Փարիզ բրեստի» և այլ ճանաչված ու սիրված աղանդերի հետաքրքիր նախապատմությունները օրերս SEASONS SWEETLAND-ում հատուկ ԶԼՄ ներկայացուցիչների ու բլոգերների համար կազմակերպված համտես-երեկոյի ընթացքում ներկայացրեց «Երեմյան Փրոջեքթս» ընկերության շեֆ-հրուշակագործ Անահիտ Միքայելյանը։
Կարդացեք նաև
Լրագրողները համտեսեցին նաև միլֆեյ, կարամելով էկլեր, կրեպ-տորթ, բելգիական շոկոլադի հումքով պատրաստված տարատեսակ բոնբոններ: Անահիտ Միքայելյանը նաեւ ծանոթացրեց հեղինակային հրուշակեղենին:
Շեֆ հրուշակագործից տեղեկացանք, որ առաջին մասնագիտությամբ դաշնակահար է, ու իր ստեղծած հրուշակեղենն էլ յուրատեսակ «քաղցր սիմֆոնիա» է:
«Հրուշակեղենը պետք է լինի ոչ միայն համեղ, այլև երաժշտության պես հույզեր և հաճելի զգացողություններ արթնացնի։ Ինչպես ամեն երաժիշտ ցանկացած ստեղծագործություն ներկայացնում է յուրովի, այնպես էլ ամեն հրուշակագործ բոլորին հայտնի թխվածքները պատրաստում է իր ձեռագրով։ Մենք, օրինակ, փորձում ենք թխվածքի բաղադրատոմսը ոչ թե ամբողջությամբ փոփոխել, այլ ստանալ մեր տարածաշրջանում ընդունված, հյուրերի և բնակիչների համար հաճելի համը»,-ասում է Անահիտը։
Ի պատասխան մեր կես կատակ-կես լուրջ հարցի` կարելի՞ է դեսերտների հարցում լինել ոչ ժուժկալ ու չգիրանալ, Անահիտ Միքայելյանը պատասխանում է, որ կինն ինքն է որոշում` կամ գայթակղվել ու նուրբ դեսերտներ վայելել, կամ զսպել իրեն ու չգիրանալ: «Սիրով կերեք ու մի գիրացեք, բայց նաեւ հիշեք, որ քիչ կալորիականությամբ թխվածք չկա»,-հավելեց նա:
Անահիտ Միքայելյանն իր երազանքն իրականացած է համարում, քանի որ շատ վաղուց ուզում էր շոկոլադով արարել:
Գոհար ՀԱԿՈԲՅԱՆ
