«Կյանքը ցույց տվեց, որ երբ առանց խոսելու, խորհրդակցելու, ՀՀ դիրքորոշումը համաձայնեցնելու ԵԱՀԿ Մինսկի խմբի hամանախագահ երկրների հետ, հայտարարություններ են լինում արցախյան խնդրով, այդ ամենն ավարտվում է մեզ համար ֆիասկոյով»,- ՀՀԿ կենտրոնական գրասենյակում տեղի ունեցած մամուլի ասուլիսի ընթացքում հայտարարեց ՀՀԿ փոխնախագահ Արմեն Աշոտյանը:
Նա շարունակեց. «Առանց համանախագահ երկրների հետ խորհրդակցելու, կապիտուլյանտը պահանջ էր դրել, որ իբր Արցախը պիտի վերադառնա բանակցային սեղան: Ավելի քան վստահ եմ, տեղեկացված, որ նրա վերջին մոգոնումները Արցախի հարցի հետ կապված, որ բանակցությունները պետք է շարունակվեն այդ սկզբունքով, ոչ թե ինքնորոշման իրավունքի և մադրիդյան սկզբունքների հիման վրա, բանակցված, համաձայնեցված չեն Մինսկի խմբի համանախագահող ոչ մի երկրի հետ: Սա նշանակում է, որ հերթական անգամ կապիտուլյանտը փորձելու է քաղաքական օրակարգով արցախյան խնդրով խաղալ մի խաղ, որտեղ չի ունենալու միջազգային բանակցային հանրության աջակցությունը այս հարցի շուրջ: Ո՞նց եք պատկերացնում՝ ՀՀ-ն սրա գլխավորությամբ ո՞նց է առաջ տանելու այդ բանակցային նոր քաղաքականությունը, եթե այն չեն սատարում ո′չ ԱՄՆ-ն, ո′չ ՌԴ-ն, ո′չ Ֆրանսիան»:
Ըստ Արմեն Աշոտյանի՝ այս ընտրությունների արդյունքներով, նրա բնորոշմամբ, դավադիր կապիտուլյանտի քաղաքական օրակարգում են հայտնվելու նաև ՀՀ-ից ակնկալվող այլ ճակատագրական զիջումները: Նա հստակեցրեց. «Խոսքը այսպես կոչված շրջանակային պայմանավորվածությունների պայմանագրի մասին է, Ադրբեջանի հետ սահմանագծման և սահմանազատման, միաժամանակ արցախյան բանակցությունների խորը և տոտալ սառեցման: Այն աստիճան սառեցման, որ հետո հնարավոր չլինի նորից տաքացնել այդ բանակցային գործընթացը»:
Տաթև ՀԱՐՈՒԹՅՈՒՆՅԱՆ
