Գեոդեզիստների և հողաշինարարների համահայկական միություն ստեղծելու գաղափարը նախաձեռնող խմբի մոտ ծագել էր դեռևս տարիներ առաջ, քանի որ առկա են ոլորտին առնչվող բազմաթիվ խնդիրներ, որոնց արդյունավետ լուծումը պահանջում է թիմային աշխատանք, միասնական մոտեցում, միասնական պայքար, ջանքեր և այլն:
2021 թվականի հունիսի 15-ին տեղի է ունեցել կազմակերպության հիմնադիր ժողով, որի արդյունքում միաձայն որոշվել է ստեղծել «Գեոդեզիստների և հողաշինարարների համահայկական միություն» հասարակական կազմակերպություն:
Կազմակերպության հանդիսավոր բացման շնորհանդեսը տեղի է ունեցել 2021թ. հունիսի 30-ին, որին մասնակցում էին ՀՀ կադաստրի կոմիտեի ղեկավար Ս. Թովմասյանը, ՀՀ ՔՏՀԱ տեսչական մարմնի ղեկավարի տեղակալ Ա. Շահբազյանը, այլ պաշտոնատար անձիք, բուհերից ներկայացուցիչներ և ոլորտի մասնագետներ:
Ավելի քան 9 տարի է Հայաստանի Հանրապետությունում ներդրված է չափագրողների (հաշվառողների), գեոդեզիստների, հողաշինարարների, քարտեզագրողների որակավորման ինստիտուտը: Սակայն, ցայսօր հանրապետությունում առկա չէր որևէ հասարակական միավորում, որը կզբաղվեր ոլորտի մասնագետների իրավունքների պաշտպանությամբ, ոլորտային խնդիրների վերհանմամբ, ինչպես նաև հասարակական հետաքննությունների (ուսումնասիրությունների) իրականացմամբ և մասնագիտական հիմնահարցերի շուրջ հասարակական կարծիքի ձևավորմամբ: Հետայսու, այս խնդիրներով և ոլորտային հիմնահարցերով մենք փորձելու ենք չլինել անհաղորդ և միության ավանդը ներդնել ի նպաստ ոլորտի զարգացման, որն էլ իր հերթին պետք է ծառայի մեր պետության զարգացմանն ու հզորացմանը:
Կարդացեք նաև
Միության հիմնադիրները նշում են, որ ցանկանում են միավորել ոլորտի մասնագետներին հանուն ոլորտի զարգացման, հայրենական գիտության և արտադրության առաջընթացի նպատակով, որպեսզի միասնական ուժերով սատար լինեն ոլորտի մասնագետների մասնագիտական և հեղինակային իրավունքների պաշտպանությանը և նպաստենք փոխվստահության և արդար մրցակցության ձևավորմանը:
Ավելին, վերջիններս նշում են, որ անմասն չեն մնալու երկրի առջև ծառացած օրակարգային խնդիրների լուծման գործում, այդ թվում` պետական սահմանի սահմանագծման և սահմանազատման աշխատանքներում: Եվ առաջարկելու են միության մասնակիցների գիտելիքները, փորձը, հմտությունները, ունեցած միջոցները ծառայեցնել ի նպաստ այդ խնդիրների լուծմանը:
«Գեոդեզիստների և հողաշինարարների համահայկական միություն» ՀԿ հիմնադիրներ`
Արթուր Ամիրաղյան
Դավիթ Սողոմոնյան
Արման Ավետիսյան
Արայիկ Հակոբյան
