«Իրականում ԵԱՏՄ-ն հնարավորություն է, ինչպես GSP+ը, բայց եթե թողնենք բարձիթողի, ոչինչ էլ չենք ստանա: Մենք մեր բիզնեսին այնքան ենք սիրում, որ ասում ենք՝ երեսուն միլիարդի ալկոգել կարտադրեն և Քովիդից կփրկեն, ինչպես մարդամեկն էր ժամանակին ասում»,- «ԵԱՏՄ ազատ առևտրի համաձայնագրերը և ներքին շուկայի պաշտպանությունը» վերլուծության քննարկման ընթացքում այսպիսի կարծիք հայտնեց ՀՅԴ Հայաստանի ԳՄ անդամ, տնտեսագետ Արթուր Խաչատրյանը։
Նա այս առիթով նշեց՝ ըստ հետազոտության՝ Սերբիայի հետ արտահանումները հինգ անգամ նվազել են, դեպի Սինգապուր արտահանումները ևս նվազել են ու ասաց. «Հարց է առաջանում՝ որքա՞ն է մեր բանակցային հզորությունը ԵԱՏՄ շրջանակներում: Այն, ինչ ԵԱՏՄ մի խմբին լավ է, մեզ համար կարող է շատ ավելի վատ լինել: Դատելով 2019-ի տվյալներով՝ 2017-ի համեմատ՝ մեր վիճակը շատ ավելի վատ է: Սա գալիս է պետական տեսլականի բացակայությունից: Ընդհանուր ինչ է մեր պետությունն ուզում և ինչպես է պատրաստվում օգնել բիզնեսին: Թողնել մենակ բիզնեսին, ասել դու կարող ես անել, դրանով ոչնչի չենք հասնի:
Պետական կառավարման մոդելի խնդիրն է, այլապես խոսել ԵԱՏՄ, GSP+, որ կարողանաս այդ շուկա մտնել, պետք է ունենաս պետություն, որը աջակցում է բիզնեսին: Գոնե թվերը ցույց են տալիս, որ մենք ունենք խնդիր: Թվերը ցույց են տալիս, որ լայն ժպիտի տակ ուրախության արցունքները ողբի արցունքներով շուտով կփոխվեն: Գոնե այս ուսումնասիրությունը ցույց է տալիս՝ այստեղ խոսքը ոչ միայն ռուսերեն խոսելուն է վերաբերում, այլև անգլերենին և մնացած ամեն ինչին»:
Տաթև ՀԱՐՈՒԹՅՈՒՆՅԱՆ
