Այսօր ԱԺ արտահերթ նիստը սկսելիս ԱԺ փոխնախագահ Ալեն Սիմոնյանն արձանագրեց, որ քվորում չկա: Ավելի ուշ քարտերը նորից հանելով ու նորից գրանցվելով՝ քվորումն ապահովվեց, գրանցվեց 69 պատգամավոր:
Երեկ քննարկվել էր իմքայլական պատգամավորներ Գեւորգ Պապոյանի եւ Լիլիթ Ստեփանյանի հեղինակած «Տարածքային կառավարման մասին» փոփոխությունների նախագիծը, որով առաջարկվում է մարզպետների աշխատանքը դարձնել ավելի արդյունավետ եւ հաշվետվողականությունը բարձրացնել: Նախատեսվում է, որ մարզպետները կարող են իրենց առաջարկությունները, ծրագրերը հատուկ ոլորտային փոխվարչապետի միջոցով փոխանցել կառավարությանը:
Այսօր երկրորդ ընթերցման ժամանակ իր ելույթում պատգամավոր Սերգեյ Բագրատյանն ասաց, որ մարզպետներն այսօր որեւէ լծակ չունեն ու եթե համայնքապետը այլ քաղաքական թիմից լինի, մարզպետի ոչ մի ասած չի լսի ու չի անի. «Մարզպետարանը հարյուրավոր աշխատակիցներ ունի, բայց որեւէ մեկի վրա չի կարող ազդել, ոչ համայնքապետի, ոչ ուժային կառույցների վրա: Պետք է կամ այնպիսի լիազորություն տանք, որ աշխատի այդ ինստիտուտը, կամ պետք է վերացնենք այդ ինստիտուտը»:
Հռիփսիմե ՋԵԲԵՋՅԱՆ
