«Այսօր». Ադրբեջանի Հանրապետության և Թուրքիայի Հանրապետության միջև ռազմական ոլորտում համագործակցության մասին համաձայնագրի համաձայն՝ հունիսի 28-ից Բաքվում սկսվել են մարտական կրակով «Մուստաֆա Քեմալ Աթաթուրք-2021» համատեղ մարտավարական վարժանքներ։
Ադրբեջանի պաշտպանության նախարար Զաքիր Հասանովն էլ նշել է, թե Ադրբեջանի, Թուրքիայի և Պակիստանի զինված ուժերի հատուկ ստորաբաժանումներն այս տարվա սեպտեմբերին համատեղ զորավարժություններ կանցկացնեն։
ՀՀ պաշտպանության նախկին նախարար Սեյրան Օհանյանի խոսքով՝ զորավարժությունները մի քանի նպատակ ունեն. առաջին նպատակը, եթե ազգային զորավարժություններ են, ազգային զինված ուժերի մարտունակության ու նաև պատրաստության բարձրացումն է, զորքերի մարտական կարողությունների ավելացումը։
Սեյրան Օհանյանի դիտարկմամբ՝ այս զորավարժությունները Հայաստանի համար վտանգ են ներկայացնում, քանի որ Պակիստանի հետ զորավարժություններին ընդգրկվում են հատուկ նշանակության ստորաբաժանումները, որոնք կարող են հատուկ գործողություններ իրականացնել։
Կարդացեք նաև
«Իսկ պակիստանցիները, մոտ լինելով Հնդկաստանին, կարող են հնդիկների անվան տակ հատուկ խնդիրներ կատարել մեր տարածքում, սա լուրջ խնդիր է Հայաստանի Հանրապետության ազգային անվտանգության ծառայության համար՝ այդ ուղղությամբ լուրջ աշխատելու համար», – նշեց պաշտպանության նախկին նախարարը։
«Այսօր մեր ԱԱԾ-ն ու Անվտանգության խորհուրդն այդ ուղղությամբ լուրջ աշխատանք պետք է կատարեն՝ բացահայտելու բոլոր այն սպառնալիքները, որոնց ուղղությամբ պլանավորում է հարկավոր իրականացնել, բայց մենք այս իրականության մեջ հակառակն ենք նկատում. փոխանակ մեր զինված ուժերի բարեփոխումներն արագացնենք, ԱԱԾ-ի կոնկրետ հակահետախուզական խնդիրների ունակություններն ավելացնենք, խոսում են բանակի բարեփոխումների մասին ու ուշադրություն դարձնում ժամկետային ծառայության կրճատմանը, կամ խոսում են կադրային ջարդերի մասին. թվում է, թե այս երկիրն ամբողջությամբ «Քաղաքացիական պայմանագիր» պետք է լինի, բայց փորձը ցույց տվեց, որ ոչ մի պայմանագիր քաղաքացու հետ չկա, դեռ ավելին, մեր միասնության գաղափարն այս վերջին պատերազմին ու պատերազմից հետո խարխլվել է, ամբողջությամբ ջարդվել է, դրան ավելացել է նաև պարտվողական քաղաքականությունը», – ասաց նա։
Անդրադառնալով ադրբեջանական մամուլում շրջանառվող տեղեկություններին, համաձայն որոնց՝ մոտ ապագայում ականներ հայտնաբերող իսրայելական ԱԹՍ-ները կարող են մտնել Ադրբեջանի սպառազինության համակարգ և սրանով հնարավոր կլինի մեկ տարվա ընթացքում ականներից մաքրել Արցախից գրավված տարածքները, պաշտպանության նախկին նախարարն ասաց, թե այդ տարածքների զգալի մասը մեր նախկին մարտական դիրքերն էին ու այնտեղ ականապայթյունային ու ոչ ականապայթյունային համակարգ էր ձևավորված մեր պաշտպանությունը կազմակերպելու ու, թե ինչպիսին էր այդ համակարգը, նույնիսկ ադրբեջանցիներն են ցույց տալիս ու զարմանում, թե ինչպիսի համակարգ ենք մենք կառուցել։
«Իրենք ձեռք են բերելու նման անօդաչու թռչող սարքեր, որպեսզի Հայաստանից ու Արցախից կախվածության աստիճանն իջեցնեն, հետագայում գերիներով մեր վրա ճնշումները շարունակեն, խաղաղության պայմանագրի, սահմանների ճշգրտման ու Ադրբեջանի տարածքային ամբողջականության խնդիրներն առաջ տանելու համար, դրա դեմ մենք լուրջ աշխատանք ունենք կատարելու։ Երկու ուղղությամբ պետք է տարվի աշխատանքը՝ միջազգային հարթակում մենք ամեն օր պետք է բարձրացնենք այն թեզը, որը ռեալ իրականությունն է, որ այս պատերազմը սանձազերծել է Ադրբեջանը, թուրք-ադրբեջանական տանդեմը վարձկաններով, նաև իսլամական աշխարհի որոշ երկրների աջակցությամբ», – ասաց նախկին նախարարը։
Անի ՎԱՐԴԱՆՅԱՆ
Նյութն ամբողջությամբ՝ սկզբնաղբյուր կայքում:
