«Ես երջանիկ եմ, որ ունեցա իմ համեստ մասնակցությունն այս հսկայական գործում։ Շնորհակալ եմ մեր գիտական խորհրդին, Սպենդիարյան թանգարանի ողջ անձնակազմին։ Սա մեծ նվեր ու հոգեւոր սնունդ է յուրաքանչյուր երաժշտի համար։ Հիշում եմ` դեռ 2010 թվականին «Գոլոս Արմենիի» թերթում հրապարկել էի մի հոդված այս աշխատության մասին, որում ասվում էր, որ Գեւորգ Բուդաղյանի գրական ժառանգությունը ոչ այնքան մեծ է, որքան նշանակալի, այստեղ խոսվում է Սպենդիարյանի «Ալմաստ» օպերայի գործիքավորման մասին եւ մեկտեղվում նրա հիշողությունների օրագրի հետ»,- ասում է «Դիտարկումներ Ա. Ա. Սպենդիարովի «Ալմաստ» օպերայի գործիքավորման շուրջ» գրքի գլխավոր խմբագիր, արվեստագիտության թեկնածու, ԵՊԿ պրոֆեսոր Ալինա Փահլեւանյանը։
Հունիսի 29-ին Ալեքսանդր Սպենդիարյանի տուն-թանգարանի դահլիճում տեղի ունեցավ Գեորգի Բուդաղյանի «Դիտարկումներ Ա. Ա. Սպենդիարովի «Ալմաստ» օպերայի գործիքավորման շուրջ» գրքի շնորհանդես-գինեձոնը: Մեծ դիրիժորը և սպենդիարյանագետն այս հիմնարար աշխատությունը ստեղծել է` տասնամյակներ շարունակ ղեկավարելով եւ ուսումնասիրելով «Ալմաստ» օպերան: Գիրքը հրատարակվել է Սպենդիարյանի տուն-թանգարանի նախաձեռնությամբ, «Էդիթ Պրինտ» հրատարակչությունում 2021 թվականին` կոմպոզիտորի ծննդյան 150-ամյակի առիթով:
Գիրքն արժեքավոր ուղեցույց է դիրիժորների, կոմպոզիտորների, երաժշտագետների, երաժիշտ մանկավարժների եւ առհասարակ, Սպենդիարյանի ստեղծագործությունը հետազոտողների համար ինչպես Հայաստանում, այնպես էլ արտերկրում: 1968 թվականին ավարտվել է վերոնշյալ օպերայի գործիքավորման մասին աշխատությունը եւ հանձնվել կոմպոզիտորի թանգարանին։
Կարդացեք նաև
«Ուզում եմ անդրադառնալ եւ շնորհակալությունս հայտնել Վահագն Վարդանյանին, որը մեծ դեր ունեցավ այս գործում` զբաղվելով գրքի էջադրմամբ եւ նոտաների համակարգչային շարվածքով, թանգարանի անձնակազմին, բոլոր նրանց, ովքեր անմասն չմնացին այս գործում։ Կարծում եմ` աշխատությունը սեղանի գիրք կդառնա ուսանողության համար, կընթերցվի եւ կսիրվի։ Վստահ եմ` գիրքը երկրորդ էջից չի փակվի, քանի որ թեթեւ եւ կենդանի գրված է»,- հավելեց տիկին Փահլեւանյանը:
«160 էջանոց գիրք ենք հրատարակել` Սպենդիարյանական շնչով։ Ռուսերեն տարբերակը հնարավորություն կտա գիրքը ճանաչելի դարձնել նաեւ Հայաստանի սահմաններից դուրս, իսկ նոտային օրինակներով առկա են այլ օտար լեզուներով տարբերակները։ Սպենդիարյանի գործիքավորումը դիտարկվում է ոչ միայն տեխնիկական տեսանկյունից, այլեւ այն, որ երաժշտության միջոցով պատկերավոր ներկայացնում է գործողությունը»,- ասում է գրքի խմբագիր Վահագն Վարդանյանը։
Շնորհանդես-գինեձոնն ուղեկցվում էր հայկական երգ-երաժշտությամբ ու գինով։ Սա սպենդիարյանցիների ոչ առաջին եւ ոչ էլ վերջին շնորհանդեսն է, կոմպոզիտորի 150-ամյակին նվիրված այլ միջոցառումներն առջեւում են։
Նատալի ՄԿՐՏՉՅԱՆ
