«1 միլիոն 280 հազար ընտրողներից 109.618-ի անձնագրերը չեն գործել. այդ պահին մասնագետները պարզապես լրացրել են տվյալները, այսինքն՝ կարող էին լրացվել այլ մարդկանց տվյալներ կամ տարբեր ընտրատեղամասերում կարող էր կրկնակի քվեարկություն տեղի ունենալ»,- այսօր, «Հայաստան» դաշինքի ընդհանուր ժողովում հայտարարեց դաշինքի անդամ Արամ Վարդեւանյանը`մանրամասներ ներկայացնելով դաշինքի կողմից Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքները վիճարկելու դիմումից:
«23.790 քաղաքացիների անձնագրերը գործել են, սակայն լուսանկարը չի ցուցադրվել, ինչը բացառում է անձի նույնականացման հնարավորությունը, եթե այդպիսի անհրաժեշտություն առաջանար: 10.993 ընտրողներ զինված ուժերի ներկայացուցիչներ էին, եւ մենք բոլորս տեսանք, թե ինչպես են քվեարկել նրանցից ոմանք: Բացի այդ, տեղեկություններ չկան այն մասին, թե որտեղ են նրանք քվեարկել: Այստեղ նույնպես ստեղծվել են բոլոր պայմանները հնարավոր խախտումների համար», – ասաց Արամ Վարդեւանյանը:
Նա հիշեցրեց նաեւ իշխանության կողմից վարչական ռեսուրսի չարաշահման դեպքերը, երբ մեծաթիվ ոստիկանական ուժերը ուղեկցում էին վարչապետի պաշտոնակատարին կամ երբ պետական հիմնարկների աշխատակիցներին տանում էին նրա հանրահավաքներին. «Մենք հիշում ենք նաեւ, որ ապրիլի 25-ին նա (Նիկոլ Փաշինյանը – Ն. Գ.) հրաժարական տվեց, սակայն շարունակեց պաշտոնավարել՝ վարչական ռեսուրսն օգտագործելու համար» եւ այլն:
Կարդացեք նաև
Նելլի ԳՐԻԳՈՐՅԱՆ
