«Մենք կարծում ենք, որ անձեռնմխելիությունը խնդիր չի առաջացնի»,- այսօր Ռոբերտ Քոչարյանի եւ Արմեն Գեւորգյանի գործվ դատական նիստից հետո լրագրողների հետ զրույցում ասաց դատախազ Գեւորգ Բաղդասարյանը:
Հիշեցնենք, որ այսօր դատական նիստում դատավոր Աննա Դանիբեկյանը հայտարարեց, որ Ռոբերտ Քոչարյանի եւ Արմեն Գեւորգյանի կարգավիճակը մի հանգամանք է, որը խոչընդոտում է դատական նիստերին: Մասնավորապես, քրեական հետապնդման ենթարկվելու անձեռնմխելիությանը, որը կապված է վերջիններիս պատգամավորի թեկնածուի կարգավիճակի հետ եւ հետագայում հնարավոր ձեռք բերվելիք պատգամավորի կարգավիճակի հետ: Սակայն մեղադրող դատախազ Գեւորգ Բաղդասարյանը գտնում էր, որ նշած կարգավորումը վերաբերում է քրգործ հարուցելուն, իսկ Քոչարյանի ու Արմեն Գեւորգյանի նկատմամբ քրեական գործը վաղուց է հարուցվել:
Ըստ դատախազի, դատավոր Աննա Դանիբեկյանը սահմանադրության նորմն այլ կերպ է մեկնաբանում. «Հետաձգել դատական նիստը, որ ինչ-որ մի օր կարող է առաջանալ անձեռնմխելիության հարց կամ չի կարող՝ ճիշտ չի: Բայց անձեռնմխելիության հարց չի առաջանում, որովհետեւ այնտեղ խոսք է գնում քրեական հետապնդում սկսելու մասին»:
Ինչպես հայտնի է, գլխավոր դատախազը 2021թ․ ապրիլի 1-ին դիմել է ՀՀ սահմանադրական դատարան՝ որոշելու Երևան քաղաքի ընդհանուր իրավասության առաջին ատյանի դատարանում քննվող Ռոբերտ Քոչարյանի և մյուսների վերաբերյալ գործով կիրառման ենթակա՝ մեղադրողի կողմից մեղադրանքը փոփոխելու լիազորությունը սահմանող՝ ՀՀ քրեական դատավարության օրենսգրքի նորմերի համապատասխանությունը ՀՀ Սահմանադրությանը։ ՍԴ-ն մերժել էր գլխավոր դատախազի դիմումի հիման վրա գործի քննությունը:
Կարդացեք նաև
Այս առնչությամբ Գեւորգ Բաղդասարյանն ասաց, որ իրավունքներ սահմանելիս օրենքներում պետք է հստակ կառուցակարգեր լինեն: Տուժողների համար սահմանվում են իրավունքներ, դրանց կառուցակարգերը չկան. «Կան հանցանք կատարած անձինք, նրանց արարքները համապատասխանում են նորմի, որը Սահմանադրությանը հակասող է ճանաչվել, այդ կարգավորումները թույլ չեն տալիս որակում տալ այդ նորմերով»:
Հարցին իրատեսական համարո՞ւմ եք, որ այս դատական ատյաններով անցնելուց ու քննությունից հետո գործի քննությունը վերաբացվի ՍԴ-ում Բաղդասարյանը պատասխանեց. «Ինչքան դրա վերաբերյալ գնահատական տալիս եմ, սկսում է դիտվել դատարանի նկատմամբ ոչ կոռեկտ գնահատական կամ ճնշում: Ես իմ հույսերի կամ հավանականությունների մասին չեմ ուզում խոսել, թեեւ կարող եմ խոսել առնվազն գլխավոր դատախազի ներկայացրած դիմումը ՍԴ-ի չընդունելուց հետո շատ բան կարող եմ խոսել, բայց չեմ խոսում»:
Հռիփսիմե ՋԵԲԵՋՅԱՆ
