ԱԺ պատգամավոր Նաիրա Զոհրաբյանը զարմացած է, որ հարգարժան բժիշկ Արմեն Չարչյանի կալանավորման փաստով ընդամենը յոթ պատգամավոր է երաշխավորություն ստորագրել, այն պարագայում, երբ շատ դեպքերում նույնիսկ մարդասպանի դեպքում կալանքը չի ընտրվում խափանման միջոց: Այսօր «Հայելի» մամուլի ակումբում կայացած ասուլիսում Նաիրա Զոհրաբյանն ասաց, որ անհատական երաշխավորություններն ուղարկված են պատկան մարմիններին: Նա հույս ունի, որ առաջիկա դատական նիստում դրանք հաշվի կառնվեն:
Բանախոսը հիշեցնում է, որ երբ գործող իշխանությունը սկսեց արդարադատության համակարգի բարեփոխումները, դրանցում հիմնական ուղերձն այն էր, որ կալանքը պետք է լինի ծայրագույն միջոց: Նաիրա Զոհրաբյանը հավելեց, որ հայտնի ձայնագրության մեջ մարդկանց վրա բռնանալու, ազատ կամարտահայտությունը ճնշելու ոչ մի դրվագի չի հանդիպել, բայց չի էլ ասում, թե ենթադրյալ հանցագործությունը պետք է կոծկվի, խոսքը վերաբերվում է ընդամենը խափանման միջոցին:
Խոսելով Բաքվում գտնվող հայ ռազմագերիների հարցի մասին, Նաիրա Զոհրաբյանն ասաց, որ գերիների ծնողներին ասել է, որ իրենից կախված ամեն ինչ անելու է, որ հնարավոր լինի նրանց որդիների վերադարձը: Նաիրա Զոհրաբյանը պատմեց, որ ԵԽԽՎ-ում ռեֆորմիստների եւ ժողովրդավարների քաղաքական խմբի նիստից հետո, մոտ 40 րոպեանոց առանձնազրույց է ունեցել Ադրբեջանի պատվիրակության ղեկավար Սամադ Սեիդովի հետ, նա հերքելով եւ մերժելով իր բերած բոլոր փաստարկները՝ կրկնել է իր երկրի քաղաքական ղեկավարության հայտնի կարծրատիպային պատասխանը, թե ռազմագերիներ չունեն, իրենց մոտ ահաբեկիչներ են:
Սեիդովը նաեւ հայտարարել է, որ իր երկրին փոխանցված Ակնայի ականապատման քարտեզների 50 տոկոսը ֆեյք են: Նաիրա Զոհրաբյանի փոխանցմամբ, ադրբեջանցի պատվիրակը շատ կեղտոտ նախապայման է դրել՝ ասելով, որ կարող է Հայաստանի իշխանություններին փոխանցել, որ իրենք պատրաստ են քննարկել ռազմագերիների վերադարձի հարցը, եթե Հայաստանը համաձայնի ստորագրել խաղաղության համաձայնագիրը, ճանաչել Արցախն Ադրբեջանի կազմում: «Քանի դեռ Հայաստանը չի ճանաչել Ադրբեջանի տարածքային ամբողջականությունը՝ մենք պետք է ռազմագերիների մասին մոռանանք»,- ադրբեջանցի պատգամավորի խոսքերը փոխանցեց Նաիրա Զոհրաբյանը`պնդելով, որ հայկական կողմը զենքերը չպետք է վայր դնի եւ շարունակի Ադրբեջանի վրա ճնշման այլ միջոցներ կիրառել: Նրա պնդմամբ, Ադրբեջանի վրա կոնկրետ սանկցիաներ պետք է կիրառվեն, քանի որ բանաձեւերի եւ հայտարարությունների վրա այդ երկրում «թքած ունեն»:
Կարդացեք նաև
Նաիրա Զոհրաբյանը հիշեցրեց, որ ԵԽԽՎ-ում առաջարկել էր կալանք դնել Ալիևի, նրա ընտանիքի եւ կլանի եվրոպական եւ բրիտանական հաշիվների վրա, ադրբեջանական պատվիրակությանը որոշակի ժամանակով զրկել ԵԽԽՎ-ում ձայնի իրավունքից, եվրոպական կառույցներին հորդորել էր օգտագործել պատժամիջոցներ կիրառելու իրենց իրավունքը, ինչպես դա անում էին Ալեքսեյ Նավալնիի դեպքում:
Պատգամավորն ասաց, որ ԵԽԽՎ-ում իշխանական պատգամավորները ևս փորձում են աշխատել`իրենց հնարավորությունների սահմաններում, այլ հարց է դրա արդյունավետությունը:
Նելլի ԳՐԻԳՈՐՅԱՆ
