«Պարոն Խանումյան, շատ հետաքրքիր է՝ դուք եւ կառավարության անդամներն այս օրինագիծը ներկայացնելու ժամանակ ծանո՞թ էիք համաշխարհային հայտնի տնտեսագետ Տարոն Աճեմօղլու «Ինչպես են ձախողում պետությունները» գրքի հետ եւ բովանդակությանը»,-Արցախի ԱԺ արտահերթ նիստում այսօր ԱՀ տարածքային զարգացման եւ ենթակառուցվածքների նախարար Հայկ Խանումյանին հարցրեց «Հայ հեղափոխական դաշնակցություն» խմբակցության պատգամավոր Դավիթ Իշխանյանը։
Հիշեցնենք, որ Արցախի ԱԺ արտահերթ նիստում քննարկվում է օրենսդրական փաթեթ, որով սահմանվում են ռազմական դրության ժամանակ պետության կողմից քաղաքացիներին պատկանող գույքի տնօրինման դեպքերը, ինչպես նաեւ՝ քրեական պատասխանատվություն է սահմանվում ռազմական դրության ռեժիմի սահմանափակումները խախտելու դեպքերի համար։
Հայկ Խանումյանն արձագանքեց․ «Այո, ես այդ գրքին շատ լավ ծանոթ եմ։ Եթե սեփականության իրավունքի բացարձակության մասին ենք ուզում դատողություն անել, ապա ինձ համար էլ այդ իրավունքը կարեւորագույն իրավունքներից է, բայց այն սահմանափակվող իրավունք է։ Մեր սահմանադրության մեջ այն հոդվածների շարքում է դա, որոնք ենթակա են սահմանափակման որոշակի իրադրության պայմաններում, այդ թվում՝ միջազգային պարտավորությունների շրջանակում։ Որեւէ մեկը չի զրկվում գույքից, բացառությամբ այն դեպքերի, երբ դա տեղի է ունենում ի շահ հանրության։ Լավ օրից չի, որ այդ իրավունքը սահմանափակվում է։ Այս իրավունքի սահմանափակմամբ նպատակ ունենք ունենալ ավելի դրական արդյունք այն մարդկանց համար, որոնք մինչեւ այսօր, օրինակ` կացարան չունեն, թեեւ օրենքն ավելի լայն գույքային հարաբերություններին եւս վերաբերում է։ Միայն անշարժ գույքին չի վերաբերում»։
Դավիթ Իշխանյան
Դավիթ Իշխանյանը կասկած հայտնեց՝ այս օրենսդրական փաթեթը շենացնելո՞ւ նպատակ ունի, թե ձախողման է հանգեցնելու։ Հայկ Խանումյանը պատասխանեց․ «Պետությունն արդեն իսկ ձախողել է։ Եթե պետության 75%-ը չկա, տասնյակ հազարավոր անտուն մարդիկ կան, արդեն իսկ ձախողված ենք։ Մենք այդ մարդկանց խնդիրները պետք է լուծենք։ Վերջնական ձախողում կլինի այն դեպքում, երբ այս մարդկանց կորցնենք հավերժ»։
Կարդացեք նաև
Արցախի ԱԺ նախագահ Արթուր Թովմասյանն էլ իր հերթին ասաց․ «Արցախյան առաջին պատերազմի ժամանակ ավելի դաժան որոշում ունեինք։ Ովքեր վեց ամիս չեն բնակվել Արցախում, նրանց բնակարանները վերցվել են։ Բազմաթիվ նման դեպքեր կան։ Իմ ցանկությունն է եղել, որ որքան հնարավոր է՝ օրենքը մեղմացվի, որպեսզի խնդիր լուծենք։ Ժամերով կարելի է խոսել, որ այս օրենքի ընդունումը ճիշտ է կամ սխալ։ Լավ կյանքից չի, որ այս փաթեթը մտել է խորհրդարան արտահերթ ռեժիմով»։
Լուիզա ՍՈՒՔԻԱՍՅԱՆ
