Արտահերթ ընտրություններն անցկացվեցին Մոսկվայի պատվերով և նրա լիակատար վերահսկողության ներքո ձևավորեցին ամբողջությամբ կրեմլահպատակ ուժերից բաղկացած Ազգային ժողով։
Մոսկվան, գործելով Անկարայի և Բաքվի հետ համաձայնաբար, նպատակ ունի 2020 թ. նոյեմբերի 9-ի եռակողմ հայտարարությունն ստորագրելու հետևանքով ապալեգիտիմացած Հայաստանի ներկայիս իշխանություններին ընտրությունների միջոցով վերալեգիտիմացնել և նրանց ձեռքով ավարտին հասցնել Լավրովի պլանի ընդլայնված տարբերակի իրագործումը։
Այդ պլանի առանցքային խնդիրն է Հայկական ԽՍՀ և Ադրբեջանական ԽՍՀ միջև եղած վարչական բաժանարար գիծը ճանաչել որպես Հայաստանի Հանրապետության և Ադրբեջանի Հանրապետության միջպետական սահման՝ կնքելով սահմանազատման և սահմանանշման մասին պայմանագիր։
Հիբրիդային տեղեկութահոգեբանական պատերազմի պայմաններում՝ Ցեղասպանության կրկնության և նախկին կեղեքիչների վերադարձի համադրված սպառնալիքի ազդեցությամբ, ձևավորված Ազգային ժողովում մեծամասնություն ստացած ներկայիս իշխանությունները չեն թաքցնում, որ կնքելու են այդպիսի պայմանագիր։
Կարդացեք նաև
Նման պայմանագրի կնքումը Արցախի հարցը Մինսկի խմբի եռանախագահության ձևաչափից ռուս-թուրք-ադրբեջանական ձևաչափ տեղափոխելու և Հայաստանին դուրս մղելու միջոցով թաղելու է դրա լուծման բոլոր հույսերն ու հեռանկարները, առհասարակ՝ խորտակելու է Ցեղասպանության հետևանքները չեզոքացնելու և Հայրենիքին վերատիրանալու հույս ու հավատով ապրող հայ ազգի իղձերն ու ապագան և ռեալ սպառնալիք է ստեղծելու մի քանի տասնամյակի ընթացքում հայոց պետականության ու հայրենաբնակ հայության հավաքական գոյության համար։
Ազգային-ժողովրդավարական բևեռը վերահաստատում է, որ չի ընդունում անարդար ու ոչ ազատ ընտրությունների արդյունքները և շարունակում է ազգային-ազատագրական պայքարը՝ նպատակ ունենալով ժողովրդի համախմբմամբ ու նրա կամքի պարտադրմամբ առաջին հերթին խափանելու Հայաստանի Հանրապետության և Ադրբեջանի Հանրապետության միջև սահմանազատման ու սահմանանշման պայմանագրի կնքումը։
Ազգային-ժողովրդավարական բևեռը դիմում է բոլոր քաղաքական ուժերին՝ կոչ անելով անհապաղ կերպով հստակ դիրքորոշում արտահայտել խորհրդային վարչական բաժանարար գիծը որպես Հայաստանի Հանրապետության և Ադրբեջանի Հանրապետության միջպետական սահման ճանաչելու և այդ նպատակով նախատեսվող սահմանազատման ու սահմանանշման պայմանագիր կնքելու վերաբերյալ։
Ազգային-ժողովրդավարական բևեռի խորհուրդ
