Տավուշի մարզի Ենոքավան գյուղում 7-րդ անգամ կայացավ հայկական բույսերի «Հայ բույս» փառատոնը։
Փառատոնի կազմակերպիչներից Իրինա Չիբուխչյանը մեզ հետ զրույցում նշեց, որ փառատոնը նպատակ ունի բացահայտել և մարդկանց իրազեկել մարզի հայտնի և անհայտ բույսերի օգտագործման և նշանակության մասին, ինչպես նաև խթանել տարածաշրջանի զարգացումը և ժողովրդականացնել հայկական բուսականությունը։
Կարդացեք նաև
«7 տարի առաջ երբ մենք սկսեցինք այս փառատոնը, մեր սկզբնական նպատակն այն էր, որ սա չլինի միայն խրախճանք, այլ մեր նպատակը գեղեցիկ միջոցառում կազմակերպելն էր, որը ուշուդրություն կհրավիրի այնպիսի չգնահատված աղբյուրներին, ինչպիսին խոտաբույսն է, որն ավելի բազմազան է, քան տարածված բույսերը․ Մեր նպատակն է, որ մարդիկ իրազեկ լինեն խոտաբույսերի մասին և նոր մարդկանց հետ շփվեն»։
Չիբուխչյանի խոսքով, փառատոնը ամեն տարի պահպանում է որոշ ավանդույթ դարձած միջոցառումներ՝ միաժամանակ ամեն տարի ունենալով անակնկալ միջոցառումներ․
«Այս տարի նոր միջոցառումներ են լինում, այս տարի մենք պատրաստեցինք 40 մետրանոց բրդուճ տարբեր խոտաբույսերից և տարբեր պանիրներից։ Ունեինք նաև տարածք երեխաների համար, որտեղ երեխաները կարող էին հայկական ավանդական խաղերը խաղալ։ Մեզ համար նաև շատ կարևոր է, որ այս ամենը տեղի է ունենում բնության գրկում և ընթացքում անգամ լինում էր, որ մենք պարզապես անջատում էինք երաժշտությունը, որպեսզի մարդիկ վայելեին բնության խաղաղությունը, լսեին թռչունների ձայնը։ Այս տարի նաև մեզ համար կարևոր էր, որ արցախցի կանայք ներկաների համար պատրաստում էին ժենգյալով հաց»։
Սաթենիկ ՀՈՎՍԵՓՅԱՆ
