Տաթեւիկ Հայրապետյանի ելույթը ԵԽԽՎ ամառային նստաշրջանում
ԱԺ պատգամավոր Տաթեւիկ Հայրապետյանը ելույթ է ունեցել ԵԽԽՎ ամառային նստաշրջանում «Մամուլի ազատության, հանրային վստահության եւ մարդկանց իրազեկված լինելու իրավունքի մասին» զեկույցի քննարկման ժամանակ:
«Հարգելի գործընկերներ,
տիկնայք եւ պարոնայք,
Կարդացեք նաև
ես արժեւորում եմ այսօրվա քննարկումը: Շատ կարեւոր է հասկանալ, թե մամուլը ինչ դեր կարող է խաղալ: Ես ցանկանում եմ, որ մենք այս հարցին այլ տեսանկյունից նայենք: Ազատ մամուլը եւ այն լրագրողները, որոնք ունեն գրելու, իրականությունը ներկայացնելու ազատություն, կարող են դիսկուրսներ ձեւավորել հանրության շրջանում, ինչի շնորհիվ հնարավոր է անգամ խուսափել պատերազմներից: Ելնելով իմ ադրբեջանցի գործընկերների ելույթներից, որտեղ նրանք հպարտորեն խոսում են, վերջին պատերազմում ձեռք բերած այսպես կոչված, «հաղթանակի» մասին՝ ես մտածում էի՝ ի՞նչ կլիներ, եթե Ադրբեջանն ունենար ազատ մամուլ եւ խաղաղության մասին դիսկուրս, եթե խաղաղության թեման արգելքի տակ չլիներ Ադրբեջանում, եւ եթե ունենային ազատություն խոսելու այն լուծումների մասին, որոնք առաջարկում էին մեդիատորները բանակցային գործընթացի ժամանակ, որը տեւեց ավելի քան քսան տարի:
Ի՞նչ կլիներ, եթե Ադրբեջանը չունենար «սեւ ցուցակ», որտեղ ներառված էին նաեւ միջազգային այն լրագրողները, որոնք այցելում էին Արցախ եւ գրում հակամարտության մարդկային կողմի մասին: Ի՞նչ կլիներ, թե պատերազմի ժամանակ ադրբեջանցիները չթիրախավորեին հայ եւ միջազգային լրագրողներին՝ անտեսելով, որ նրանք կրում էին «PRESS» գրվածքով հագուստ:
Ի վերջո, ցավոք, անգամ զինադադարի մասին եռակողմ հայտարարությունից հետո վերջերս մենք ականատես եղանք, որ անգամ ՈՒԵՖԱ-ն էր զարմացել, երբ Ադրբեջանը հրաժարվում էր հավատարմագրել այն լրագրողներին, որոնք ունեին հայկական ազգանուններ: Այս ամենը ցույց է տալիս, որ խաղաղության դիսկուրսը արգելված էր Ադրբեջանում, եւ, ցավոք, իմ ադրբեջանցի գործընկերները մտածում էին, որ միակ ճանապարհը դա պատերազմն է, քանի որ դա էր քարոզվում: Ես արժեւորում եմ այս զեկույցը եւ կարծում եմ, որ մամուլի ազատությունը շատ կարեւոր է:
Լրագրողները իրենց աշխատանքով, որը հաճախ բարդ է եւ վտանգավոր, կարող են օգնել խուսափել պատերազմներից եւ պայքարել ատելության խոսքի ու ատելության քարոզի դեմ:
Շնորհակալություն»,-նշել է պատգամավորը:
