Այսօր Գյումրիում լրագրողները փոխվարչապետի պաշտոնակատար Տիգրան Ավինյանից հետաքրքրվեցին գերիների հայրենադարձման գործընթացից։
«Ես կարող եմ ասել, որ այդ գործընթացը շարունակական է, ինչպես տեսել ենք՝ պրոցես կա և շարունակվելու է: Չեմ ասի, որ դա նույնպես հեշտ պրոցեսներից է, բայց ես համոզված եմ, որ այդ առումով նույնպես ունենք հնարավորություն փոխհամաձայնությունների գալու և երկկողմանի խնդիրները լուծելու»,- ասաց Տիգրան Ավինյանը։
Մեր դիտարկմանը՝ առաջիկայում սպասե՞նք գերիների վերադարձի, Տիգրան Ավինյանն արձագանքեց․ «Եկեք այդ հատվածով որևէ մեկնաբանություն չասեմ»։
Կարդացեք նաև
Բաքվում դատվող հայ ռազմագերիների մասին էլ հետաքրքրվեցինք ՀՀ արդարադատության նախարարի պաշտոնակատար Ռուստամ Բադասյանից։
«Դա ամբողջովին ապօրինի, որևէ իրավական կարգավորման տակ չընթացող պրոցես է, միջազգային հանրությունն արդեն բոլոր մակարդակներով արձանագրել է, որ գործ ունեն ռազմագերիների հետ, որ անհրաժեշտ է անհապաղ ապահովել ռազմագերիների վերադարձը հայրենիք։
Եվ կարծում եմ՝ այդ գործողությունները միայն վնասում են Ադրբեջանին և, ցավոք սրտի, մենք անընդհատ ձգձգում ենք ունենում ժամկետների գերիների վերադարձի, բայց նորից եմ կրկնում՝ դա ապօրինություն է Ադրբեջանի կողմից և իր արձագանքը ստանալու է»։
Նունե ԱՐԵՎՇԱՏՅԱՆ
