«Սա այս իշխանության ձեռագիրն է։ Կյանքեր փրկած մարդուն կեղծ մեղադրանքով ուզում են ճնշել։ Եթե այս մեղադրանքը լիարժեք կիրառեն ու արդար կերպով, ապա իրենց մարզպետները պետք է ազատազրկվեն՝ այն ճնշումների համար, որոնք գործադրել են դպրոցների տնօրենների, համայնքների ղեկավարների վրա»,-դատարանի դիմաց Արմեն Չարչյանին կալանավորելու քննիչի միջնորդության քննարկման ժամանակ այսօր լրագրողների հետ ճեպազրույցում ասաց «Հայաստան» դաշինքի վարչապետի թեկնածու Իշխան Սաղաթելյանը։ Ըստ նրա՝ Արմեն Չարչյանի պես մարդուն դատարան քարշ տալը սրիկայություն է, իսկ իշխանությունն առաջիկայում բոլոր հնարավոր միջոցներով փորձելու է ճնշել այդ թվում լրագրողներին, ընդդիմախոսներին, դատարաններին։
Հիշեցնենք, որ «Իզմիրլյան բժշկական կենտրոն»-ի ղեկավար Արմեն Չարչյանը, որը նաեւ «Հայաստան» դաշինքով պատգամավորության թեկնածու է, մեղադրվում է կենտրոնի աշխատակիցներին ԱԺ արտահերթ ընտրություններին մասնակցելուն առերեւույթ հարկադրելու համար, մեղադրանքը չի ընդունում, այն համարում է քաղաքական հետապնդում եւ գտնում է, որ իր մասնակցությամբ հայտնի ձայնագրությունում ուղղորդման տարրեր չկան։ Ինչ վերաբերում է իշխանության հայտարարությանն այն մասին, թե թավիշը փոխարինելու են երկաթե մանդատով, Սաղաթելյանը Նիկոլ Փաշինյանի վերաբերյալ հետեւյալ կարծիքը հայտնեց․ «Ձեռքը ճար լինի՝ մեզ քվե տված 270 000 մարդկանց կկալանավորի։ Դա է իր տեսակը։ Թույլ չենք տալու»։
Կարդացեք նաև
Լուիզա ՍՈՒՔԻԱՍՅԱՆ
