ՍԴ աշխատակազմի նախկին ղեկավար, դեսպան, նախկին մարզպետ Էդգար Ղազարյանն այսօր ընտրությունների արդյունքներն ամփոփելիս ասաց. «Վայոց Ձորում իմ հարազատները վախենում են զանգել ինձ ու խոսել: Ֆիքսվում է ամեն բան: Մեկի ավտոմեքենան, եթե տվյալ շտաբից 25 մետրի վրա կանգնած է լինում, զանգում կանչում են, թե ինչի՞ է մեքենան այնտեղ կանգնած: Հազար տարվա մտերիմները վախենում են մոտենալ միմյանց: Կոտայքում թող մեկը Գագիկ Ծառուկյանի համար աշխատեր ինչպես առաջներում: Ի՞նչ կլիներ նրա հետ: Վախեցել են մոտենալ եւ բարեւ տալ: Այդպես էր բոլոր ընդդիմախոսների հանդեպ: Այս պայմաններում ի՞նչ ընտրության մասին է խոսքը:
Նա հինգ տոկոսից ավելի վստահություն չունի: Սա մեկ մարդուց եւ մազից կախված իշխանություն է, որը կարող է ամեն պահ պայթել, անգամ մինչեւ մանդատ ստանալը: Ի՞նչ 53 տոկոսի մասին է խոսքը: Անգամ այս պայմաններում նրա թեկնածությանը կողմ քվեարկել է մոտ 27 տոկոսը: Մարդիկ, որ չեն գնացել քվեարկության, դա ի՞նչ վերաբերմունք է նշանակում: Փաթեթի մեջ չկար չէ՞ «դեմ եմ բոլորին» քվեաթերթիկ: Հետեւաբար, մարդիկ իրենց այս վերաբերմունքը ինչպե՞ս են արտահայտել: Պարզ չէ՞, որ քվեարկությանը չմասնակցելով: Եվ այդ բոլորի մեջ նաեւ ինքն է մտնում չէ՞: Գնացածների կեսն իրեն չի ընտրել՝ ընտրել է ուրիշ քաղաքական ուժերի: Քվեարկության մասնակիցների մասով նույնիսկ իրեն ձայն տվածների թիվը 2018-ից հետո պակասել է 200 հազարով:
Անգամ նրա օգտին քվեարկածներին, որոնց պայմանականորեն անվանում են զոմբի, մի համարեք, որ վստահում են: Բավական է Հ1-ով մի երկու փաստագրական ֆիլմ ցույց տան, ամբողջ տպավորությունը կփոխվի, ընդհանրապես նրա մասին ոչ ոք չի մտածի: Ընդհակառակը, բացասական կարտահայտվեն: Նրան կողմ քվեարկողների մեծ մասը հեռավոր մարզերի ու գյուղերի բնակիչներն են, որոնք միայն Հ1 են կարողանում դիտել եւ իրական տեղեկատվության պակաս ունեն»:
Աշոտ ՀԱԿՈԲՅԱՆ
