«Որեւէ նման հանդիպում չի եղել, որեւէ քաղաքական առեւտուր ուղղակի ոչ մեկի հետ հնարավոր չէ: Մենք քաղաքական առեւտրականներ չենք, ի տարբերություն շատերի»,- այսօր կայացած մամուլի ասուլիսում ասաց ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը՝ պատասխանելով Aravot.am-ի հարցին՝ տեղեկություններ կան, որ ընտրությունների օրը ուշ երեկոյան, օտարերկրյա դիվանագիտական ներկայացուցիչների հետ հանդիպումներ են եղել. ի՞նչ հանդիպումների մասին է խոսքը, արդյոք քաղաքական առեւտրի հետեւա՞նք են ընտրությունների արդյունքները:
Հաջորդ հարցին՝ քարոզարշավը կառուցել էիք եւ Դուք էլ քանիցս հայտարարեցիք, որ դա հավելյալ հնարավորություն է՝ առկա խնդիրները գույքագրելու, դրանց ծանոթանալու, որպեսզի ամսի 21-ից՝ իշխանությունը վերցնելուց անմիջապես հետո, զբաղվեք դրանց լուծմամբ. ինչի՞ վրա էր հիմնված այդ համոզմունքը, Ձեզ սխա՞լ տեղեկատվություն էր տրամադրվել, Ռոբերտ Քոչարյանը պատասխանեց, որ հարցը սխալ տեղեկատվություն մատուցելու մեջ չէ եւ հավելեց, որ քարոզարշավի ժամանակ բավական հետաքրքիր եւ լայնածավալ տեղեկատվություն է ստացել, բայց քանի որ իշխանությունը ձեւավորել է ՔՊ-ն, լուծումները պետք է տան իրենք:
Ռոբերտ Քոչարյանը նաեւ տեղեկացրեց, որ տվյալներ ունեն՝ ուժային կառույցներում, այդ թվում նաեւ ընտրությունների օրը, բավական լուրջ գումարներ են բաժանվել՝ պարգեւավճարների տեսքով: Ասաց, որ հրապարակային եւ օրինական թղթերով բացահայտելու են այդ ամենը՝ խորհրդարանում. «ԱԱԾ-ում մեծ գումարների պարգեւավճարներ են ստացել՝ ամբողջ սպայական կազմը: Ես դեմ չեմ, որ իրենք ստանան, բայց կարելի էր դա տալ ընտրություններից հետո: Մի քանի օր գոնե սպասել եւ դա չկապել ընտրական գործընթացների հետ»:
Պատասխանելով հարցին՝ չի՞ կարծում, որ ընտրությունների արդյունքները ավելի տպավորիչ կլինեին, եթե ինքն ընդուներ Լեւոն Տեր-Պետրոսյանի առաջարկը եւ երեք նախագահների գլխավորած ուժերը միասին մասնակցեին ընտրություններին, Ռոբերտ Քոչարյանն ասաց, որ իր գնահատմամբ, այդ դեպքում «նախկինների» գործոնը շատ ավելի արտահայտված կլիներ, ինչը առավել վատ արդյունքի կհանգեցներ:
Կարդացեք նաև
Այլ մանրամասները՝ տեսանյութում
Նելլի ԳՐԻԳՈՐՅԱՆ
