«Դեռ չեմ որոշել՝ հրաժարվել, թե ընդունել պատգամավորական մանդատը: Ես գործադիր իշխանության մարդ եմ: Դժվար եմ ինձ պատկերացնում օրենսդիր մարմնում: Մեր թիմի մի մասը պնդում է, որ ճիշտ է՝ ես լինեմ խորհրդարանում, օգտագործեմ այդ ամբիոնը քաղաքական պայքարի համար: Մյուս մասը կարծում է, որ պետք չէ: Ես անձնապես այդպիսի ցանկություն չունեմ, բայց վերջնական որոշում դեռ չունենք: Պետք է շատ սառնասիրտ, առանց զգացմունքային տարրի այդ որոշումը ես կայացնեմ: Ես ինձ դժվար եմ տեսնում խորհրդարանում»,- այսօր կայացած մամուլի ասուլիսում ասաց ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը:
Մանրամասնելով ընտրությունների արդյունքները ՍԴ-ում վիճարկելու թեման՝ նա հայտարարեց, որ առայժմ հստակ չէ, թե ի՞նչ հիմքով են դիմելու, քանի որ դեռ ամբողջական նյութերը չկան: Բայց ուշագրավ հայտարարություն արեց գրանցված զանգվածային խախտումների մասին. մի ողջ շրջանում դաշինքի շտաբի պետերին ընտրություններից մեկ օր առաջ բերման են ենթարկել՝ մեղադրանքով, թե կասկածներ ունեն, որ շտաբներում տպագրական մեքենաներ են տեղադրված, որոնցով քվեաթերթիկներ են տպագրվում: Այս իրողությունը Ռոբերտ Քոչարյանը աբսուրդ է համարում, ինչի արդյունքում 60-ից ավել մարդ բերման է ենթարկվել՝ մի քանի ժամով խաթարելով շտաբների գործունեությունը:
Այսօր շտաբների եւ ենթաշտաբների պատասխանատուները կներկայացնեն համապատասխան տեղեկատվություն եւ վաղը արդեն հստակ կլինի ցանկը, որով դիմելու են ՍԴ:
Կարդացեք նաև
Նելլի ԳՐԻԳՈՐՅԱՆ
