Շիրակի մարզը, որն Ազգային ժողովի արտահերթ ընտրություններում իր մասնակցությամբ եղել է ամենապասիվը (226 763 քվեարկելու իրավունք ունեցողներից քվեարկել են 93 551–ը կամ 41,24 %–ը), կունենա ընդամենը 1-2 իշխանական պատգամավորներ։
Մարզն այս անգամ զրկվեց ընդդիմադիր պատգամավորներ ունենալու հնարավորությունից, նախ այն պատճառով, որ ՀՀ երկրորդ նախագահ Ռոբերտ Քոչարյանի գլխավորած «Հայաստան» դաշինքի համամասնական ցուցակի անցողիկ տեղերում շիրակցիներից և որևէ մեկն ընդգրկված չէր, իսկ «Պատիվ ունեմ» դաշինքի Շիրակի մարզի շտաբի պետ, նախկին պատգամավոր Մարտուն Գրիգորյանը համամասնական ցուցակի 8-րդ տեղում է, որն անցողիկ չէ։
Նշենք, որ ըստ նախնական արդյունքների, մանդատները կբաշխվեն հետևյալ կերպ՝ «Քաղաքացիական պայմանագիր» կուսակցություն՝ 71 մանդատ, «Հայաստան» դաշինք՝ 29 մանդատ և «Պատիվ ունեմ» դաշինք՝ 7 մանդատ։
«Քաղաքացիական պայմանագիր կուսակցության անցողիկ տեղերում Շիրակի մարզից ընդգրկված են Ազգային Ժողովի պատգամավոր Նազելի Բաղդասարյանը և Շիրակի մարզպետ Հովհաննես Հարությունյանը։ Նազելի Բաղդասարյանը, որն ակտիվ պատգամավորներից մեկն է, Նիկոլ Փաշինյանի կողմից արժանացավ գնահատականի՝ զբաղեցնելով ցուցակի 12-րդ տեղը։ Շիրակի մարզպետ Հովհաննես Հարությունյանը զբաղեցնում է 38-րդ տեղը։
Կարդացեք նաև
Եթե մարզպետը հրաժարվի պատգամավորական մանդատից, անցողիկ տեղերում գտնվողներից մի քանիսը վերադառնան գործադիր աշխատանքի, Գյումրիից կընդգրկվի նաև համամասնական ցուցակի 72-րդ տեղը զբաղեցնող Էմմա Պալյանը։
Ինչևէ, սա բացառիկ դեպքերից է, երբ բնակչության թվով հանրապետության երկրորդ մարզն այսքան քիչ պատգամավորներ է ունենում, թեև հանուն արդարության նշենք, որ գործող պատգամավորներից ոչ բոլորն էին մանդատի արժեքը հասկանում ու պատգամավորի գործառույթը պատկերացնում։
Շիրակի մարզը միշտ բավական ճոխ է ներկայացված եղել ԱԺ-ում, 6-րդ գումարման խորհրդարանում 8 պատգամավորներ կային Շիրակի մարզից՝ բոլոր խմբակցություններից։
Նունե ԱՐԵՎՇԱՏՅԱՆ
