«Որքանով որ երեկ մեզ հաջողվել է հետեւել ընտրական գործընթացին, կարծես թե չենք ունեցել նման դեպքեր, որ մինչ այդ նկատված խնդիրներով որեւէ քվեաթերթիկ անվավեր ճանաչվեր»,-ՀՀ կենտրոնական ընտրական հանձնաժողովում այսօր լրագրողների հետ ճեպազրույցում անդրադառնալով հարցին, թե քաղաքական ուժերի կողմից խոտանված քվեաթերթիկների մասին ահազանգերի փաստը որքանով կարող է ազդել ընտրությունների արդյունքի վրա՝ ասաց ԿԸՀ նախագահ Տիգրան Մուկուչյանը։ «Եթե կլինեն նման խնդիրներ, բնականաբար, կդառնան քննարկման առարկա»,-նշեց նա։
Ինչ վերաբերում է երեկվա հոսանքազրկումներին, Տիգրան Մուկուչյանը հայտնեց․ «Տեխնիկական սարքավորումների աշխատանքի հետ կապված խափանումներ չենք ունեցել, որովհետեւ կային համապատասխան մարտկոցներ։ Հոսանքազրկման պարագայում դրանք հնարավորություն էին տալիս շարունակել աշխատանքը, այսինքն՝ քվեարկության ընթացքը։ Խնդիր էր լինում տեսախցիկների հետ կապված, որոնք անջատվում էինք, բայց հոսանքը վերականգնվելու դեպքում անմիջապես դրանք էլ էին վերականգնվում»։
Լրագրողները հետաքրքրվեցին՝ դրանք պատահակա՞ն հոսանքազրկումներ էին։ «Նման դատողություններ անելու համար պետք է ունենալ լուրջ հիմքեր։ Եթե նման հիմքեր չունենք․․․մեծ հաշվով, եթե հոսանքը տեղամասում չի անջատվել որեւէ մեկի կողմից, այլ եղել է ընդհանուր հոսանքազրկման հետեւանք, մենք տվյալ պարագայում չենք կարող լինել հարցի հասցեատեր»,-պատասխանեց ԿԸՀ նախագահը։
Կարդացեք նաև
Լուիզա ՍՈՒՔԻԱՍՅԱՆ
