Այսօր 7/50 ընտրատեղամասում ընտրողներից մեկը քվեախուց մտնելուց հետո քվեաթերթիկները ձեռքը շվարած դուրս եկավ՝ բողոքելով, թե ո՞ւր է գրիչը, ես ուզում եմ խզմզեմ:
Հանձնաժողովի անդամներն ասացին, որ գրիչ չկա այս ընտրություններին: Երիտասարդն էլ հրավիրեց հանձնաժողովականների ուշադրությունը. «Ներողություն, ձայնը անվավեր սարքել հնարավոր չի՞»:
Կարդացեք նաև
Նա դժգոհում էր, որ իր իրավունքն է գալ ընտրության ու ոչ մեկին չընտրել, բայց ինչո՞ւ իրեն չեն տալիս հնարավորություն: Ի վերջո տղան որոշեց քվեաթերթիկներից մեկը պատռել, նոր դնել ծրարի մեջ՝ դրանով արտահայտելով իր վերաբերմունքը:
Նույն ընտրատեղամասում մի կին դժգոհեց, որ իրեն չեն տվել 24 համարի «Հայաստան» դաշինքի քվեաթերթիկը: Հանձնաժողովականները լրացրեցին պակասը:
Ընտրողներից մեկն էլ քվեարկելուց հետո ավելորդ քվեաթերթիկները դուրս էր ուզում հանել, հանձնաժողովականները նկատեցին ու թույլ չտվեցին:
Հռիփսիմե ՋԵԲԵՋՅԱՆ
