«Ընտրությունս կատարել եմ դեռեւս 33 տարի առաջ եւ այսօր էլ վերաբերմունքս չի փոխվել։ Քվեարկել եմ հանուն անվտանգ, ինքնիշխան, տնտեսապես զարգացած Հայաստանի եւ Արցախի, հանուն հզոր հայկական բանակի»,-քվեարկությունից հետո այսօր լրագրողների հետ ճեպազրույցում հայտարարեց ՀՀ երրորդ նախագահ Սերժ Սարգսյանը։
«Ողջ իրավապահ համակարգը հատկապես քարոզարշավի վերջին օրերին ակնհայտ հրահանգավորմամբ լծված է մեր դեմ բիրտ ուժ կիրառելուն։ Անհասկանալի հրավերներ են տեղի ունենում իրավապահ համակարգի բաժիններ, ապօրինի՝ առանց դատարանի որոշման խուզարկություններ»,-նշեց Սերժ Սարգսյանը՝ խոսելով «Պատիվ ունեմ» դաշինքի հանդեպ տեղի ունեցած իրավախախտումներից։
Կարդացեք նաև
«Ապօրինի ձերբակալությունները հաստատվել են դատական ակտերով։ Մենք առավոտից ուշադիր հետեւում ենք իրադարձություններին։ Կարծում եմ՝ հայտարարություն կանենք»,-հավելեց Սերժ Սարգսյանը։
Այսօր ամենամեծ խնդիրը, Սերժ Սարգսյանի խոսքով, պառակտված հասարակությանը միավորելն է, առանց որի հնարավոր չէ անվտանգություն ու տնտեսական զարգացում ունենալ։
Լրագրողները հետաքրրքվեցին՝ Ռոբերտ Քոչարյանը ձեզ ներե՞լ է իշխանությունը Նիկոլ Փաշինյանին հանձնելու համար։ Սերժ Սարգսյանը պատասխանեց․ «Ինձ կարող է ներել միայն աստված, ուրիշ ոչ մեկը»։
Հարցին ի պատասխան, թե նախկին վարչապետ Կարեն Կարապետյանն ինչու է Ռոբերտ Քոչարյանին սատարում, ոչ թե իրեն, Սերժ Սարգսյանը հորդորեց Կարեն Կարապետյանից հարցնել․ «Դրանում ի՞նչ մեծ ողբերգություն կա որ»։
Լրագրողները նաեւ հետաքրքրվեցին՝ Նիկոլ Փաշինյանի վերընտրվելու դեպքում ինչպիսի՞ ապագա եք տեսնում։ Սերժ Սարգսյանը պատասխանեց, որ չի կարող լինել ապագա։
Լուիզա ՍՈՒՔԻԱՍՅԱՆ
