Այսօր Գյումրի բժշկական կենտրոնում ազդարարվեց STROKE գլխի սուր իշեմիկ կաթվածի բուժման նորագույն ծրագիրը։ Մարզերից Շիրակն առաջինն է, որտեղ ներդրվում է կյանքներ փրկող այս ծրագիրը՝ պետպատվերի սահմաններում։ Այսինքն՝ բոլոր ծախսերը հոգում է պետությունը, իսկ բուժումները շատ թանկ են․ կախված հիվանդի վիճակից ու բժշկական միջամտության անհրաժեշտությունից՝ պետությունը յուրաքանչյուր քաղաքացու համար 1,5 միլիոն դրամից մինչև 2,5-3,8 միլիոն դրամ է հատկացնում։
Նյարդաբան Ժորա Բաղդասարյանը, որն աշխատելու է Գյումրի բժշկական կենտրոնում ու իրագործելու է այս ծրագիրը, տեղեկացրեց, որ այն սկիզբ է դրվել 2019 թվականին փետրվարի 1-ից «Էրեբունի» բժշկական կենտրոնում և 1-ին հիվանդանոցում, այնուհետև «Աստղիկ» բժշկական կենտրոնում, իսկ այսօր` Գյումրիում։
Ժորա Բաղդասարյանի ներկայացմամբ՝ ծրագիրն ուղղված է իշեմիկ կաթվածի սուր փուլում բուժմանը, այսինքն՝ բուժումը հնարավոր է իրականացնել հիվանդության ամենասկզբնական փուլում։
Կարդացեք նաև
Դրանք ժամանակակից բուժումներ են, որոնց դեպքում հիվանդի կենդանի մնալու, չմահանալու և հաշմանդամ չդառնալու շանսերը շատ ավելի մեծանում են։Այս մեթոդների կիրառությունը թույլ է տալիս իջեցնել մահացությունը և հաշմանդամությունը։
Բժիշկը, սակայն, նշում է, որ այս նորագույն մեթոդները, որոնք կիրառվում են իշեմիկ ինսուլտի դեպքում, ունեն մեկ թերություն, շատ սահմանափակ ժամանակում է հնարավոր բուժում իրականացնել։ Ըստ նրա, դա է պատճառը, որ Երևանից հեռու գտնվող տեղանքների բնակչության համար շատ դեպքերում հնարավոր չէ բուժումն իրականացնել, մինչև հիվանդին տեղափոխում են Երևան, այդ թանկ, սահմանափակ ժամանակը կորցնում են։
Ըստ նրա, թրոմբոլիտիկ բուժումը հնարավոր է իրականացնել ինսուլտի նշանները սկսելուց ոչ ուշ, քան 4,5 ժամվա ընթացքում։
Շատ դեպքերում հիվանդներն այդ 4,5 ժամվա ընթացքում կարող են հիվանդանոց չգնալ, որովհետև, ըստ նյարդաբանի, մեծամասամբ ինսուլտի նշանների դեպքում ցավեր չկան և շատ հաճախ չեն կողմնորոշվում։ Իսկ այդ 4,5 ժամվա ընթացքում բժիշկը պիտի հասցնի հիվանդին հետազոտել, որպեսզի կարողանա ժամանակի մեջ տեղավորվել։
Ըստ մեր զրուցակցի, կաթվածը ՀՀ-ում մահվան երկրորդ պատճառն է համարվում։
Բացի այդ, այս հիվանդությունը շատ տարածված է, ինսուլտը մեր երկրում հաշմանդամության առաջին պատճառն է հանդիսանում։
Մեր զրուցակիցն ասում է, որ նախքան այս ծրագրի մեկնարկը, ՀՀ-ում ինսուլտից մահացությունը 30 տոկոսի չափ էր կազմում, 10 ինսուլտով հիվանդացածներից 3-ը մահանում էին։ Իսկ օրինակ՝ « Էրեբունի» բժշկական կենտրոնում այս ծրագրի ներդրումից հետո մահացությունը իջեցվել է մինչև 12 տոկոս։
Մի քանի անգամ իջեցվում է նաև հաշմանդամ դառնալու հավանականությունը։
Գյումրի բժշկական կենտրոնի տնօրեն Արմեն Իսահակյանը փաստում է, որ շատ հիվանդների էին ուղարկում Երևան, ժամանակի կորստի պատճառով ոչ բոլորին էր հնարավոր լինում փրկել։
Նա ևս մեջբերում է «Էրեբունի» բժշկական կենտրոնի տվյալները, որտեղ ծրագրի ներդրմամբ 1000 հոգու կյանք է փրկվել։
Նունե ԱՐԵՎՇԱՏՅԱՆ
