Այսօր՝ հունիսի 18-ին՝ արտահերթ խորհրդարանական ընտրությունների քարոզարշավի վերջին օրը Հայաստանի դեմոկրատական կուսակցությունը հոլովակ է տարածել, որում դիմում է ժողովրդին:
«Հարգելի հայրենակիցներ,
Մենք այսօր պարտադրված անում ենք այս հայտարարությունը: Կենտրոնական ընտրական հանձնաժողովը, և ցավոք սրտի, դատական համակարգը, վարչապետի մեր թեկնածու Տիգրան Արզաքանցյանին զրկեցին ընտրություններին մասնակցելու հնարավորությունից», – ասաց Հայաստանի դեմոկրատական կուսակցության նախագահ Արամ Սարգսյանը՝ հավելելով, որ սա բացահայտ քաղաքական պատվեր է, և ուղղված է իրենց հաղթարշավը կասեցնելուն:
Հիշեցնենք, որ կենտրոնական ընտրական հանձնաժողովը մերժել էր Տիգրան Արզաքանցյանին որպես պատգամավորի թեկնածու գրանցումը: ԿԸՀ որոշումը բողոքարկվել էր դատարան, որը սակայն այն թողել էր ուժի մեջ:
Կարդացեք նաև
Արամ Սարգսյանը պնդեց. «Կենտրոնական ընտրական հանձնաժողովի որոշումը ոչինչ չի փոխում, քանզի կուսակցության համագումարի որոշմամբ վարչապետի թեկնածուն միևնույն է Տիգրան Արզաքանցյանն է, և այդպես լինելու է և՛ այսօր, և՛ վաղը, և՛ մյուս օրը»:
ԵՊՀ դասախոս Նարինե Դիլբարյանը նշեց, որ Հայաստանի դեմոկրատական կուսակցությունը ներկայացրել է թե՛ այլընտրանքային ծրագիր, թե՛ երկիրը ոտքի կանգնացնելու այլընտրանքային թեկնածու, որոնք միասին հաղթելու են:
«Ժողովուրդ ջան, իրար հետ հաղթելու ենք: 15-րդ համարը հաղթական թիվ է»,- եզրափակեց Տիգրան Արզաքանցյանը:
Մանրամասները՝ տեսանյութում
Նելլի Գրիգորյան
