«Կենտրոնական ընտրական հանձնաժողովի հունիսի 18-ի արտահերթ նիստի օրակարգում 7 հարց կար, բացի մեկ հարցից, բոլորը դիմումների քննությանն են վերաբերվում»,-ասաց ԿԸՀ նախագահ Տիգրան Մուկուչյանը: Հավելեց, որ հանձնաժողովի անդամները ծանոթացել են նախագծին: Օրակարգի հարցերից մեկը «Զարթոնք» ազգային քրիստոնեական կուսակցության դիմումն էր՝ ատելության խոսքի վերաբերյալ, որը ԿԸՀ-ն մերժեց:
Փաստաբանների պալատի նախագահ, «Զարթոնք» ազգային քրիստոնեական կուսակցության գործադիր մարմնի պատասխանատու Արա Զոհրաբյանն Aravot.am-ին հայտնեց, որ ԿԸՀ-ն մերժել է իրենց դիմումը, ավելի ճիշտ վարույթը կարճել են, բայց իրենք եւս մեկ դիմում ունեն՝ կրկին ատելության խոսքի մեկ այլ հատվածի մասին:
«Մենք նորից դիմում էլ ենք ներկայացրել, հիշում եք, որ դատարանը մերժել էր մեր հայցն ընդդեմ ԿԸՀ-ի եւ ՔՊ-ի, բայց նաեւ մերժման հիմքում դրել էր այն հանգամանքը, որ ԿԸՀ-ն ատելության խոսքի դեպքում պետք է միջամտեր, նախազգուշացներ խախտողին՝ «Քաղաքացիական պայմանագիր» կուսակցությանը, նաեւ դիմեր իրավասու մարմնին: Եվ մենք կրկին դիմել ենք ԿԸՀ-ին խնդրելով, որ այդ միջոցառումները կատարվեն: Այդ դիմումը դեռ չի քննարկվել, բայց ենթադրվում է, որ պետք է անհապաղ քննարկվի»,-ասաց Արա Զոհրաբյանը:
Գոհար ՀԱԿՈԲՅԱՆ
