Aravot.am-ի հետ զրույցում «Հայաստան» դաշինքի Շիրակի մարզի պատասխանատուներից մեկը՝ Կարապետ Պողոսյանն, ամփոփելով քարոզարշավի ընթացքն, ասաց․ «Սա Հայաստանի պատմության մեջ ամենատարբերվող, գաղափարական ընտրությունն է: Բնականաբար քարոզարշավն էլ չի կարող լինել նույն ստանդարտների մեջ, ինչ նախկինում։ Ավելին ասեմ, սա ընտրություն չէ, սա իմ համար, մեր թիմի համար հայ ազատագրական պայքարի կարևորագույն ճակատամարտերից մեկն է և տրամադրված ենք այդ ճակատամարտը հաղթելու»։
Ըստ Կարապետ Պողոսյանի, քարոզարշավը հիմնականում հանդարտ անցավ Շիրակի մարզում ՝ բացառությամբ մեկ-երկու տհաճ միջադեպերի։
Նա որպես վարչական ռեսուրսի կիրառման դեպք նշում է «Հայաստան» դաշինքին համակրող պոլիկլինիկայի և դպրոցի տնօրենների պաշտոնազրկումը, նրանց նկատմամբ ճնշումներ գործադրելը։
Մեր դիտարկմանը, թե ձեզ ևս մեղադրում են «Հայաստան» դաշինքին հարող համայնքապետերի կողմից վարչական ռեսուրսների կիրառման մեջ, խոսակցություններ են պտտվում նաև ընտրակաշառքի մասին, Կարապետ Պողոսյանն ասաց․ «Հերթական սուտն է, հերթական մանիպուլյացիաներն են, որին գնաց իշխանությունը։
Կարդացեք նաև
Բոլորին էլ հայտնի է, որ իրենք ամեն ինչ փորձում են անել, որ ընտրությանը մասնակցության թիվը լինի չափազանց ցածր, որպեսզի դեռևս գիտակցության կամ ադեկվատության չվերադարձած քաղաքացիների հաշվին կարողանան որոշակի արդյունքներ գրանցել։
Կարող եմ միանշանակ ասել, որ ընտրակաշառքի մասին խոսակցությունները հենց իշխանական ուժի կողմից է տարածվում, որպեսզի հասարակության ինչ-որ մի հատվածի կարողանան պահել տանը, և մարդիկ չգնան, ընտրություններին չմասնակցեն։
Ես շատ պատասխանատու ձևով հայտարարել եմ և նորից հայտարարում եմ՝ ընտրակաշառք չի կարող բաժանվել, գոնե մեր մասով վստահեցնում եմ, որովհետև կրկին շեշտեմ ՝սա մեր համար ընտրություն չէ, սա մեր համար լինել-չլինելու կռիվ է և փողով դու մարդու մեջ չես կարող հայրենասիրություն մտցնել։ Մեզ միայն հետաքրքիր են հայրենիք ունեցող և հանուն հայրենիքի քայլ անող քաղաքացիները»,- ասաց Կարապետ Պողոսյանը։
Նունե ԱՐԵՎՇԱՏՅԱՆ
