«ԱՄՆ դեսպանատան հայտարարությունը տարօրինակ չի՞։ Դեսպանատան հարգելի աշխատակազմ, հարգելի տիկին դեսպան, այն, որ նման բան եք հայտարարում եւ հոգ եք տանում ձեր քաղաքացիների մասին, շատ գովելի է։ Բայց այդ կանխազգացումները, անհանգստությունն ո՞ւմ պատճառով են»,-լրագրողների հետ ճեպազրույցում այսօր հայտարարեց «Պատիվ ունեմ» դաշինքի ներկայացուցիչ, ՀՀԿ փոխնախագահ Արմեն Աշոտյանը։
Հիշեցնենք՝ ՀՀ-ում ԱՄՆ դեսպանատունը զգուշացրել է իր քաղաքացիներին զգոն լինել Հայաստանում մոտակա երկու շաբաթներին՝ կապված հետընտրական հնարավոր գործընթացների հետ։
«Խիզախություն ունենայիք ու ասեիք, թե ում պատճառով է։ Ասում եք, թե հանրահավաքներ են լինելու։ Մտավախություն ունե՞ք բախումներից։ Բա մի հատ զուգահեռ քննադատեիք այս իշխանությանը՝ անհանդուրժողականության մթնոլորտի , սպառնալիքների, քաղաքական հակառակորդների գլխին ճոճվող մուրճի համար։ Այդ օդից իջա՞վ ձեր անհանգստությունը։ Ո՞վ է դրա պատճառը, ե՞ս, Վանեցյա՞նը, թե Սերժ Սարգսյանը։ Իշխանության պահվածքն է չէ՞ պատճառը։ Բա ո՞ւր մնացին ձեր ժողովրդավարական չափանիշները։ Ինչո՞ւ չեք ասում, որ նման բաներն անընդունելի են։ Մի թթու, ճշմարիտ բառ ասեիք ընտրությունները թունավորողների հասցեին։ Թե՞ արդեն պատրաստի տեքստեր են գրվել դիտորդական առաքելություններում»․-հարցադրումներ արեց ՀՀԿ փոխնախագահը։
Կարդացեք նաև
Ըստ Արմեն Աշոտյանի՝ դեսպանատան հայտարարություն անուղղակի կշտամբանք է գործող իշխանությանը, որի պահվածքի պատճառով քաղաքացիական բախումների վտանգ կա։
Լուիզա ՍՈՒՔԻԱՍՅԱՆ
Լուսանկարը՝ արխիվային
