«Շատ ահավոր վիճակում ենք գտնվում: Գրեթե բոլոր կուսակցությունները իրար ամենաանպատիվ բառերն են շռայլում: Բոլորս անունները գիտենք՝ սկսած Սերժ Սարգսյանից, Ռոբերտ Քոչարյանից ու Նիկոլ Փաշինյանից: Իսկ մեր վարչապետի թեկնածուն միշտ ասում է, որ պետք է ընտրություն կատարել արդեն փտած ծառերի եւ նոր տնկիների միջեւ: Նոր տնկիները հնարավոր է ջրել, էտել, հասցնել այն աստիճանին, որը ժողովրդի համար կլինի ցանկալի»,- այսօր հրավիրած ամփոփիչ ասուլիսում ասաց «Արդար Հայաստան» կուսակցության պատգամավորության թեկնածու, լրագրող, գրող Լուսինե Ղազարյանը:
Նրա խոսքով՝ մարդկանց դժվար է բացատրել, որ իրենք այս կամ այն ուժի արբանյակը չեն. «Մենք այս պահին վերելակով բարձրանում էինք, վերելակի մեջ մի երիտասարդ էր, որն իմանալով, որ մենք մասնակցելու ենք մամուլի ասուլիսի, ասաց՝ ձեր քաղաքական ուժը ընտրակաշառք չի՞ բաժանում: Մարդկանց մեջ դա է արմատավորվել, հենց վերելակում սպասում են, որ դու պիտի իր ձայնը գնես, ամբողջ խնդիրը դա է»:
Ըստ Լուսինե Ղազարյանի, իրենց քաղաքական ուժը պետք է լինի խորհրդարանում, որ կերտի արդար Հայաստան, այլապես լճանալու ենք:
«Արդար Հայաստան» կուսակցության վարչապետի թեկնածու Նորայր Նորիկյանն ասաց, որ անհաշտ մթնոլորտում անգամ ընտանիքում հնարավոր չէ զարգացում ապրել: Հետեւաբար պետք է աշխատել՝ մթնոլորտը փոխելու, տնտեսությունը զարգացնելու համար:
Կարդացեք նաև
Խոսելով հայ ռազմագերիների խնդրի մասին՝ Նորիկյանն ասաց, որ ակնհայտ է՝ Ադրբեջանը այս գործընթացում ոտնահարում է իր իսկ կողմից ստորագրված փաստաթուղթը. «Այստեղ ոչ միայն Հայաստանի, այլ նաեւ ՌԴ-ի հեղինակության խնդիրն էր: Ակնհայտ է, որ այդ հայտարարությունը ստորագրած կողմերից Ադրբեջանը տապալում է, իսկ ՌԴ-ին չի հաջողվում հասնել այդ հայտարարության կետով ամրագրված հանձնառության ամբողջական իրագործմանը:
Հռիփսիմե ՋԵԲԵՋՅԱՆ
