Ադրբեջանի գլխավոր դատախազությունը քրեական գործ է հարուցել Ռուսաստանի երեք հայ գործարարների նկատմամբ՝ նրանց դեմ հայտարարելով միջազգային հետախուզում՝ Հայաստան անօրինական ճանապարհով զենք տեղափոխելու մեղադրանքով:
Գլխավոր դատախազությունը քննությունն իրականացրել է լրատվամիջոցների և սոցցանցերի հրապարակումների հիման վրա:
Քննությունը պարզել է, թե իբր «Տաշիր» ընկերությունների խմբի ղեկավար Սամվել Կարապետյանը, Royalsys Engineering-ի սեփականատեր Դավիթ Գալուստյանը, KOMEX-ի գլխավոր տնօրեն Արա Աբրահամյան և այլ անձիք «Հայաստանի ԶՈՒ-ին սպառազինությամբ, զինամթերքով, պայթուցիկ նյութերով և ռազմատեխնիկայով ապահովելու նպատակով … 2001-2021թթ. մաքսանենգ ճանապարհով սպառազինություն են մատակարարել Հայաստանին, իսկ այնտեղից՝ Հայաստանի կողմից օկուպացված Լեռնային Ղարաբաղ և Ադրբեջանի հարող շրջաններ»:
Բեռնափոխադրումներն իրականացվել են ուղևորատար ինքնաթիռներով, Հայաստանի ռազմաօդային ուժերի բեռնատար օդանավերով, ինչպես նաև Արա Աբրահամյանի կողմից ձեռք բերված բեռնատար օդանավով:
Կարդացեք նաև
Դատախազությունը նշված անձանց խափանման միջոց է ընտրել կալանքը և միջազգային հետախուզում հայտարարել նրանց նկատմամբ: Դատախազությունը իրավական օգնության խնդրանքով դիմել է Ռուսաստանի համապատասխան պետական մարմիններին:
Պատրաստեց Վիկտորյա ԱՆԴՐԵԱՍՅԱՆԸ
