Հայաստանի ֆիզիկական կուլտուրայի եւ սպորտի պետական ինստիտուտում այսօր փրկարարների եւ արկածային տուրիզմի սիրահարների համար շահագործեց արհեստական ժայռապատ, ինչը թիմային երկար ու ծավալուն աշխատանքի արդյունք է: Մագլցելը հասանելի է լինելու փրկարարների, արկածային տուրիզմի սիրահարների, ինչպես նաեւ երեխաների համար:
ՀՖԿՍՊԻ ռեկտոր Դավիթ Խիթարյանի խոսքով. «Ինստիտուտում փրկարարական գործի մասնագիտությունը ամենապահանջվածներից է: Փրկարարի որակավորումը հնարավորություն է տալիս ոչ միայն աշխատել հանրակրթական դպրոցում որպես ֆիզկուլտուրայի ուսուցիչ, այլեւ աշխատանքի անցնել ԱԻՆ-ում եւ այլ ծառայություններում: Այս մարզաձեւում կրթական որակը բարելավելու համար շատ կարեւոր են ինչպես փորձնական, այնպես էլ գործնական մարզումները, ինչից մենք զրկված էինք մինչեւ հիմա եւ օգտվում էինք մեր գործընկերների, այդ թվում՝ ԱԻՆ ակադեմիայի, նախարարության բացօթյա բազաներից ու պայմաններից: Ինստիտուտում նույնպես այդպիսի հնարավորություն ստեղծելու ցանկությունը պայմանավորված էր նաեւ նրանով, որ այդպես մեր ուսանողները նաեւ ձմռան ամիսներին մարզվելու հնարավորություն կստանան:
Մենք կարեւորում ենք, որ լեռնամագլցումը որպես մարզաձեւ արագորեն զարգանում է աշխարհում: Եվ այս առումով արհեստական պատի առկայությունը հնարավորություն կտա նաեւ մեր ինստիտուտում կազմակերպել միջբուհական մրցումներ, մանկապատանեկան միջոցառումներ»:
Կարդացեք նաև
Դավիթ Խիթարյանը նշեց, որ ժայռամագլցման արհեստական պատից օգտվելը բաց կլինի բոլոր ցանկացողների համար, կգործի գնային ճկուն քաղաքականություն, իսկ սոցիալական որոշ խավերի դրանից անվճար օգտվելու հնարավորություն կընձեռվի: «Այսօր հուշագիր ենք ստորագրելու ալպինիզմի եւ լեռնային տուրիզմի ֆեդերացիայի հետ, որը մեր մոտ կկազմակերպի իր մանկապատանեկան խմբերի մարզումները: Սա դեռ մեծ ճանապարհի սկիզբն է: Հետագայում պլանավորել ենք հնարավորությունները մեծացնել»,-ասաց ռեկտորը:
Աշոտ ՀԱԿՈԲՅԱՆ
