Գագիկ Ծառուկյանի ելույթից առաջ, Ազատության հրապարակում, ԲՀԿ-ի եզրափակիչ հանրահավաքի ժամանակ պայթեցին «վարչապետ Ծառուկյան» վանկարկումները:
Գագիկ Ծառուկյանն ասաց`գալիս է փրկելու հայրենիքն ու ժողովրդին. «Դուք բոլորդ տեսաք, որ Ալիեւն ու Էրդողանն եկան մեր հող`Շուշի, իրար հետ փաստաթուղթ ստորագրեցին: Որ ես վեց ամիս է ասում եմ`հարկավոր է Ռուսաստանի հետ նոր փաստաթուղթ ստորագրել, մեր բարեկամ երկրի հետ`ռազմաքաղաքական: Ես դա իմանալով, որ Թուրքիան աջակցելու է Ադրբեջանին, թուղթ ստորագրեցին, որ ցանկացած պատերազմի ժամանակ Թուրքիան Ադրբեջանի կողքն է լինելու, մեր դարավոր բարեկամը Ռուսաստանն է, մենք պետք է իր հետ անկեղծ լինենք, վերականգնենք կապերը»:
Գագիկ Ծառուկյանը քննադատեց գործող իշխանության քաղաքականությունը`տարակուսանք հայտնելով այն հայտարարությունների առնչությամբ, որ ՀՀ-ի եւ ՌԴ-ի հարաբերություններում խնդիրներ չկան. «Եվրոխորհրդարանում քննարկում է լինում, որ ասենք թե լիարժեք, Հայաստանը դեմ է լինում ՌԴ-ին: Բա ո՞նց է Ռուսաստանի հետ բարեկամական կապերը լավ: Միայն ԲՀԿ-ի պատգամավորն է ՌԴ-ի օգտին քվեարկում: Դրա համար հիմնական խնդիրը մենք պետք է վերականգնենք: Մենք պետք է կարողանանք Ռուսաստանի հետ միասին, ոչ թե, ինչ-որ լինում է մեր ռուս գործընկերների վրա գցենք»:
Գագիկ Ծառուկյանի կարծիքով, Հայաստանը պետք է ունենա պրոֆեսիոնալ բանակ, իսկ պայմանագրային զինծառայողներին մեկ միլիոն դրամ պետք է վճարել, ոչ թե 150 հազար: Անվտանգային խնդիրները ԲՀԿ վարչապետի թեկնածում առաջնային է համարում:
Կարդացեք նաև
Նա մանրամասն ներկայացրեց նաեւ ԲՀԿ-ի տնտեսական ծրագիրը, անդրադարձավ մասնավորաբար գյուղատնտեսության զարգացմանը: Ասաց, որ 2018-ից հետո մեկ միլիարդ դոլարի ներդրում է բերել Հայաստան, որպեսզի Արարատի մարզում պարարտանյութերի գործարան հիմնեն, բայց իշխանությունները ընթացք չեն տվել`«մարդը թողել-գնացել է»: ԲՀԿ-ն առաջարկում է նաեւ փոքր ու միջին բիզնեսին մեկ տարով ազատել հարկային պարտավորություններից, որպեսզի հնարավոր լինի կայացնել այդ խավը:
Գագիկ Ծառուկյանը վստահեցնում է, որ իրենց առաջարկած տնտեսական ծրագրի իրագործման պարագայում հնարավոր կլինի զարգացում ապահովել, աշխատավարձերը եւ կենսաթոշակները բարձրացնել եւ կասեցնել արտագաղթը, որը աննախադեպ չափերի է հասնում: Գագիկ Ծառուկյանը խոսեց նաեւ Հայաստանում ազատ տնտեսական գոտի հիմնելու մասին`Դուբայի օրինակով: Նա ասաց, որ միշտ է զարգացման ծրագրեր առաջարկել, բայց բոլոր ժամանակներում իշխանությունները խանգարել են իրեն`տարբեր տիպի ճնշումներ գործադրելով:
ԲՀԿ-ում պատրաստ են ընտրություններից հետո համագործակցության քննարկումներ սկսել այն ուժերի հետ, որոնք կիսում են իրենց գաղափարները:
Գագիկ Ծառուկյանը հայտարարեց, որ 2018-ից հետո միավորված նախարարությունները պետք է առանձնացվեն: Գյուղատնտեսության, սփյուռքի նախարարությունները պետք է պարտադիր վերականգնվեն:
Գագիկ Ծառուկյանը լավատես է, նա վստահ է, որ «Աստված, Հիսուս Քրիստոսը մեզ անտեր չի թողնի»:
Նելլի ԳՐԻԳՈՐՅԱՆ
