Aravot.am-ը ահազանգ ստացավ, որ Հայաստանի ազգային պատկերասրահի կամարին փակցված է «Քաղաքացիական պայմանագիր» կուսակցության քարոզչական պաստառը, այն դեպքում, երբ օրենքն արգելում է նախընտրական քարոզչություն իրականացնելը, քարոզչական նյութեր տարածելը մշակութային հաստատություններում:
Հայաստանի ազգային պատկերասրահի տնօրեն Մարինա Հակոբյանն Aravot.am-ին ասաց, որ Պատկերասրահի շենքի կամարների հետ իրենք կապ չունեն, Պատմության ազգային թանգարանն է պատասխանատուն: Պատմության թանգարանից հեռախոսով փոխանցեցին, որ տնօրենն ու փոխտնօրենը զբաղված են եւ չեն կարող զանգերի պատասխանել, բայց խնդրին տեղյակ են եւ իրենց համար էլ ընդունելի չէ:
Երեւանի քաղաքապետի մամուլի պատասխանատու Հակոբ Կարապետյանն Aravot.am-ին տեղեկացրեց, որ հարցը իրենց տիրույթից դուրս է:
Aravot.am-ը ԿԳՄՍ նախարարի մամուլի քարտուղար Գեղամ Մելիքբեկյանից հետաքրքրվեց` մի՞թե ԿԳՄՍ նախարար Վահրամ Դումանյանը, որ ՔՊ ցուցակում է, ԿԳՄՍ նախարարությունը, որի ենթակայությամբ գործում է Հայաստանի ազգային պատկերասրահը, տեղյակ չեն, որ օրենք է խախտվել: Գեղամ Մելիքբեկյանը պատասխանեց, որ հարցն ուսումնասիրվում է եւ մանրամասների մասին ավելի ուշ կտեղեկացնի օրվա ընթացքում:
Կարդացեք նաև
Կուսակցության հարցերով լրատվամիջոցների հետ աշխատող ԱԺ «Իմ քայլական» պատգամավոր Վահագն Ալեքսանյանը զանգերի չպատասխանեց, այլապես իրենից եւս կճշտեինք, թե ինչու է իշխող ուժը օրենք խախտել:
«Քաղաքացիական պայմանագիր» կուսակցության նախընտրական շտաբն այս առնչությամբ ՖԲ էջում տարածել է հետեւյալ հաղորդագրությունը. «Ի պատասխան հարցումների հայտնում ենք, որ այսօր Հանրապետության հրապարակում տեղի է ունենալու «Քաղաքացիական պայմանագիր» կուսակցության համապետական հանրահավաքը, որի շրջանակում բեմի հետնամասում կախվել են պաստառներ, որոնք հանրահավաքի ձևավորման մի մասն են կազմում: Հանրահավաքից անմիջապես հետո պաստառները կհանվեն»:
Գոհար ՀԱԿՈԲՅԱՆ
