«Քաղաքացիական պայմանագրի անդամները գլուխները պատով են տալիս, որ Կարեն Կարապետյանի մասին նման բան են ասում։ Տարած-բերածն իրենք են՝ Ալիեւի եւ Էրդողանի տուն, այն էլ՝ մի քանի անգամ։ Նույնը վերաբերում է իրենց ղեկավարին»,-լրագրողների հետ հանդիպմանն այսօր հայտարարեց «Պատիվ ունեմ» դաշինքի ներկայացուցիչ, ՀՀԿ փոխնախագահ Էդուարդ Շարմազանովը՝ անդրադառնալով այն հանգամանքին, որ ՔՊ պատգամավորի թեկնածու Սուրեն Պապիկյանը նախկին վարչապետ Կարեն Կարապետյանին «տարած-բերած ժիլետի թեւ» է անվանել։
Էդուարդ Շարմազանով
Ինչ վերաբերում է այն հանգամանքին, որ Կարեն Կարապետյանը 2018թ․-ին ՀՀԿ քաղաքական թիմի անդամ էր, իսկ հիմա սատարում է Ռոբերտ Քոչարյանի գլխավորած «Հայաստան» դաշինքին, Էդուարդ Շարմազանովը շեշտեց․ «Կարեն Կարապետյանը 2018թ․-ին արդեն իսկ ասել է իր քաղաքական եւ քաղաքացիական դիրքորոշման մասին՝ դիմում գրելով եւ դուրս գալով ՀՀԿ-ից։ Նա ինքն է որոշում, թե որ քաղաքական բլոկում է ուզում լինել։ Հիասթափեցնեմ ՔՊ-ական շրջանակներին․ «Պատիվ ունեմ» եւ «Հայաստան» դաշինքների միջեւ կռիվ գցելու բոլոր փորձերն ապարդյուն են։ Կարեն Կարապետյանի հետ մենք շատ նորմալ հարաբերություններ ունենք, «Հայաստան» դաշինքի հետ հակառակորդներ չենք, պայքարի խրամատում ենք»։
Լուիզա ՍՈՒՔԻԱՍՅԱՆ
