«Այլ քաղաքական ուժերի վերլուծությունները չեմ կարող մեկնաբանել, բայց ակնհայտ է, որ այլեւս ոչ մի ուժ ՀՀ-ում չի կարող համարվել ժողովրդի ամբողջական աջակցությունը վայելող ուժ։ Եվ որեւէ մեկը չի կարող համարվել ժողովրդական առաջնորդ։ Բոլորը դարձել են սովորական քաղաքական գործիչներ»,-Երեւանում նախընտրական քարոզարշավի ժամանակ այսօր լրագրողների հետ ճեպազրույցում հայտարարեց «Լուսավոր Հայաստան» կուսակցության վարչապետի թեկնածու Էդմոն Մարուքյանը՝ անդրադառնալով երրորդ նախագահ Սերժ Սարգսյանի տվյալներին այն մասին, թե Նիկոլ Փաշինյանը չունի ժողովրդի մեծամասնության վստահության քվեն։
«Ոչ մի ուժ չի հաղթելու այս ընտրություններում։ Պետք է հաղթի ժողովուրդը։ ՀՀ-ում առաջին անգամ պետք է ձեւավորվի ազգային համաձայնության կառավարություն։ Սա է մեր տեսլականը։ Ոչ թե մենք ենք հաղթելու, այլ ժողովուրդը, եւ երկրին համերաշխություն է բերվելու»,-համոզմունք հայտնեց Էդմոն Մարուքյանը։
Նրա խոսքով՝ նախկիններն ու ներկաները պատրաստ չեն ազգային համաձայնության կառավարություն ձեւավորելուն, բայց դա կարող է պարտադրել ժողովուրդը․ «Եթե ուժերից մեկը 40-50% ձայն ստանա, ո՞նց պատրաստ լինի։ Չի լինի։ Իսկ եթե ստանա 15-20%, խելոք պատրաստ կլինի։ Յուրաքանչյուրը կհամակերպվի իր 20% ձայների հետ եւ կնստի սեղանի շուրջ՝ ազգային համաձայնության կառավարություն ձեւավորելու։ Ժողովուրդը պետք է մերժի բախումները, ատելությունը»։
Կարդացեք նաև
Լուիզա ՍՈՒՔԻԱՍՅԱՆ
