«Քաղաքացու որոշում» սոցիալ դեմոկրատական կուսակցության (ՔՈ) անդամները քարոզարշավի 10-րդ օրը քաղաքացիների հետ հանդիպումներ ունեցան Երևանի Մալաթիա-Սեբաստիա վարչական շրջանում:
ՔՈ անդամները մոտենում էին քաղաքացիներին և նրանց լսում, թե ինչ կարծիք ունեն ներկայիս քաղաքական իրավիճակի հետ կապված, ներկայացնում կուսակցության ծրագրային դրույթները:
ՔՈ գործադիր մարմնի անդամ Հայկ Սահակյանը, մոտենալով մի տարիքով տղամարդու ասաց՝ ուզում են իր հետ խոսել քաղաքականությունից: Նա էլ արձագանքեց՝ դե, հարցրեք: Տղամարդը բավականին վատատես էր քաղաքական զարգացումների հարցով: Նա ասաց. «Ամեն ինչը փոփոխվում, զարգանում է, քաղաքականությունը նույնն է մնում»:
Ի պատասխան Հայկ Սահակյանն ասաց. «Մենք էլ առաջարկում ենք նոր գաղափարներ, նոր ուժ ենք: Երեսուն տարի ղարաբաղյան հարցը չեն կարողանում լուծել, ուրեմն նրանք պիտի գնան, ու գա նոր ուժ»:
Կարդացեք նաև
ՔՈ անդամների մյուս զրուցակիցը մի տարեց կին էր: Նա չթաքցրեց՝ զայրացած է բոլոր կուսակցությունների վրա: Հայկ Սահակյանն էլ արձագանքեց. «ՔՈ-ն համ խելացի, համ սիմպատիչնի, շատ լավ կուսակցություն է, համ էլ նոր ուժ ենք, համ էլ ոչ նախկին ենք, ոչ ներկա, առաջարկում ենք նոր ծրագրեր»:
Հայկ Սահակյանը քաղաքացիների հետ զրույցում վստահեցրեց. «Մենք ոչ նախկին ենք, ոչ ներկա, մենք գաղափարական ուժ ենք, հստակ արժեքներ ունենք, որոնցով արդեն երեք տարի է անկախ քաղաքական կոնյունկտուրայից շարժվում ենք»:
Նա մտահոգություն հայտնեց, որ ագրեսիվ փոքրամասնությունն այնքան բարձր է գոչում, որ մարդկանց ռացիոնալ մտքերը չեն լսվում ընդհանրապես:
Մի կին էլ ՔՈ անդամների հետ զրույցում վրդովվեց, թե բոլորը հայտարարում են, որ գերիներին հետ են բերելու, բայց դա օգտագործում են իրենց շահերի համար ու ասաց. «Գերի բերող էին, թող վաղուց բերեին»: ՔՈ անդամները հայտարարեցին՝ գերիներին սեփական փիարի համար օգտագործելն անընդունելի է:
Տաթև ՀԱՐՈՒԹՅՈՒՆՅԱՆ
