Ինչպես արդեն հայտնել ենք, «Սիվիլիթաս» հիմնադրամը «Արցախի հարց և անվտանգություն թեմայով բանավեճ էր կազմակերպել: Բանավեճին մասնակցում էին Հանրապետական, Լուսավոր Հայաստան, Հայ ազգային կոնգրես, Բարգավաճ Հայաստան, Քաղաքացու որոշում, Ազատական կուսակցությունների ներկայացուցիչները: Քաղաքացիական պայմանագիր կուսակցության և «Հայաստան» դաշինքի ներկայացուցիչները չէին մասնակցում բանավեճի՝ չնայած հրավիրված են եղել:
«Ազատական» կուսակցությունից Արամ Ղլեչյանը իր խոսքում անդրադարձել էր ՀՀԿ-ին՝ նշելով. «Մենք չպիտի մոռանանք, որ պատմականորեն ունեցել ենք դասեր, որոնք պետք է ուսանելի լինեն, մասնավորապես՝ մինչև 2018 թվականը Հայաստանի Հանրապետությունում իշխանությունը ներկայացնող քաղաքական ուժը ակնհայտորեն ձախողել է պետական անվտանգության քաղաքականությունը, և դրա ապացույցը՝ 2016 թվականին ԼՂ-ի նկատմամբ ռազմական ագրեսիան էր»:
ՀՀԿ-ից Հայկ Մամիջանյանը պատասխանեց այս հայտարարությանը. «Ձեր տպավորությամբ՝ 41 թվականին ԽՍՀՄ-ն թո՞ւյլ էր, որ Հիտլերը հարձակվեց Ռուսաստանին: Լա՛վ, պարզ է, շարունակելը, կարծում եմ, ավելորդ է: Ամեն դեպքում՝ Ապրիլյան պատերազմը եղել է հաղթանակ: Զուտ որպես հայը՝ հային խնդրում եմ այդպես անել՝ անկախ նրանից՝ ընտրություններում ի՞նչ արդյունքներ կգրանցենք: Անձամբ Ձեր դերակատարումը Արցախյան խնդրին շատ փոքր է, որ Դուք կարողանաք մեր կուսակցության առաջնորդների դերակատարումը կասկածի տակ դնել: Հաջորդ կետը՝ բոլոր այն քաղաքացիները, որոնք պատրաստվում են ձայն տալ պարոն Բաբայանի ղեկավարած քաղաքական ուժին, ուզում եմ հիշեցնել, որ վերջին երկու ամսում շաբաթական առնվազն 2-3 օր, այնպես է ստացվել, որ ես հրապարակի մոտ եմ աշխատում, ամեն երեկո պարոն Բաբայանը իր 100.000 դոլարանոց մեքենայով և 8 միլիոն դոլարանոց պետական համարանիշներով, որոնց հետ կապված յուրացումների քրեական գործ կա, անցկացնում է կառավարության շենքում և բանակցում է ներքին գործերի նախարարի պաշտոն ստանալու կամ չստանալու հարցը: Այդ բանակցությունների արդյունքը հետագայում կտեսնենք»:
Կարդացեք նաև
Արամ Ղլեչյանը արձագանքեց. «Մենք այսօր ունենք իրավիճակ, երբ Հայաստանի Հանրապետությունում իրավապահ մարմինների կողմից հարուցվել են քրեական գործեր, որոնցով առանցքային դերակատարներ են Ձեր կուսակցության ներկայացուցիչները: Հիշեցնեմ մի հետաքրքիր իրողություն՝ պարոն Բաբայանին չարախոսում են միայն թուրքերը, և դա տարիներ շարունակ ընդունված երևույթ է, և հանցագործները»:
Ամի ՉԻՉԱԿՅԱՆ
