Հունիսի 16-ին ԱԺ անկախ պատգամավոր Սոֆիա Հովսեփյանը հանդիպեց Եվրոպայի ոչ ֆորմալ կրթության ասոցիացիայի նախագահ Վալդաս Յանկաուսկասի հետ:
Հանդիպման առանցքում ոչ ֆորմալ կրթությանը վերաբերող հարցերն էին: Զրուցակիցներն անդրադարձան ոչ ֆորմալ կրթության առանձնահատկություններին, այդ կրթատեսակի կազմակերպման դժվարություններին եւ դրանց հաղթահարման ուղիներին: Մասնավորապես անդրադարձ կատարվեց այդ ոլորտում Լիտվայի գրանցած հաջողություններին: Վալդաս Յանկաուսկասը ներկայացրեց Լիտվայի փորձը` մանրամասնելով, թե իր երկիրն ինչպիսի դժվարություններ է հաղթահարել, ինչպիսի օրենսդրական բարեփոխումներ են իրականացվել այդ ճանապարհին:
Սոֆիա Հովսեփյանի խոսքով` Հայաստանում այսօր ոչ ֆորմալ կրթությունն իրականացվում է չկանոնակարգված: Կան որոշ խնդիրներ` կապված ոլորտի վերահսկելիության եւ զարգացման հեռանկարի հետ: «Հետեւաբար անհրաժեշտ է բարեփոխել եւ՛ օրենսդրությունը, եւ՛ Կառավարության համապատասխան որոշումները»,- նշում է պատգամավորը՝ հավելելով, որ ոչ ֆորմալ կրթության դաշտը հստակեցնելու եւ կարգավորելու համար անհրաժեշտ է ունենալ մեկ ամբողջական օրենք:
Խնդիրը կարգավորելու նպատակով զրուցակիցները համագործակցելու պատրաստակամություն հայտնեցին:
Կարդացեք նաև
Նշենք, որ այժմ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում, որի անդամ է նաեւ Սոֆիա Հովսեփյանը, մշակվում է ոչ ֆորմալ կրթությանն ու արտադպրոցական կրթությանը վերաբերող օրենսդրական փաթեթ:
ՀՀ Ազգային ժողով
