«Ինչու եմ ես հայտնվել ՔՊ ցուցակում եւ ԱԺ պատգամավորի հայտ եմ ներկայացրել: Շատ երկար եմ մտածել: Իրենք 3 տարի աշխատել են, ես այդ աշխատանքը տեսել եմ»,- այսօր Կապանում ՔՊ-ի քարոզարշավի ժամանակ ասաց Խաչատուր Սուքիասյանը:
Նա սկսեց գովել Նիկոլ Փաշինյանի կառավարությանն ու իշխանությանը. «Առաջինը՝ եղել են սկզբունքային, ազնիվ, ամեն ինչ արել են՝ հանուն Հայաստանի զարգացման, հանուն Հայաստանի ուժեղացման: Հովանավորչությունը բերել են զրո մակարդակի, մենաշնորհները բերել են զրո մակարդակի: Կաշառակերություն չկա: Մարդիկ անում են ամեն ինչ, որպեսզի մեր ժողովուրդը լավ ապրի, որ Հայաստանը հզորանա, մրցունակ երկիր դառնա: 25 տարի Հայաստանը մրցունակ երկիր չի եղել, կեղեքել են, թալանել են: Իրենք են ղեկավարել, իրենք են որոշել, համակարգային կոռուպցիա է եղել, բայց ազնիվ համակարգ չի եղել, որ պետք է ծառայի հասարակությանը: Ես վստահում եմ ՔՊ կուսակցության սկզբունքներին, գաղափարին, մոտեցումներին, տեսլականին, որը իրենք պատկերացնում են»:
Խաչատուր Սուքիասյանը հորդորեց ճիշտ վերլուծել իրավիճակը. «1 մրդ դոլարին համարժեք դրամ ավել գումար է բյուջեում հավաքվել, այդ գումարները չեն մսխվել: Դուք ինքներդ տեսնում եք դպրոցաշինությունը, ճանապարհաշինությունը: Այդ ամեն ինչը նրա համար է, որ Հայաստանը հզոր լինի, մարդիկ ուզենան ՀՀ-ում ներդրումներ անել: Ես այսօր կանգնած եմ այս սկզբունքների, այս ծրագրերի կողքին: Ես ինքս էլ եմ կրելու, որ այս ծրագրերը կյանքի կոչվեն ու Հայաստանը զարգանա, դառնա հզոր պետություն»:
Հռիփսիմե ՋԵԲԵՋՅԱՆ
