«Իմ քայլը» խմբակցության պատգամավոր Արմեն Խաչատրյանն այսօր Կապանում ՔՊ-ի նախընտրական քարոզարշավի ժամանակ դիմեց ընտրակեղծարարներին. «Այն մարդիկ, պաշտոնյաները, անկախ իրենց սոցիալական դիրքից, գրպանի պարունակությունից, անցած ճանապարհից, ովքեր կհամարձակվեն ձեզ հարկադրել, կաշառք կառաջարկեն, նրանք այս ազգի տականքներն են: Կա՛մ պետք է իրենք հաշտվեն, որ այս ազգի տականքներն իրենք են, կա՛մ պետք է գան ու ինձանից հաշիվ պահանջեն: Այդ տականքներն են փշրում մեր ապագան, մեր անվտանգությունը ու մեր երկիրը տանում դեպի այդ գարշահոտ ճահիճը: Մենք հազիվ ենք պրծել այդ գարշահոտ ճահճից»:
Տարածքային կառավարման եւ ենթակառուցվածքների նախարար Սուրեն Պապիկյանն էլ ներկայացրեց, թե Սյունիքի մարզում ճանապարհաշինական ինչ աշխատանքներ են իրականացնելու այս տարի Սյունիքի մարզում, ընդհանուր առմամբ՝ 125,6 կմ. «Այս պահին Տաթեւ-Աղվանի ճանապարհի երկու հատվածներն են ընթանում, մինչ տարեվերջ մենք կունենանք այլընտրանքային ճանապարհ, որը մեզ կտանի դեպի Երեւան…Մի շարք կապալառուներ, որոնք որոշակի փոխկապացվածություն ունեն տարբեր մերժվողների, համայնքապետերի հետ, օրինական ճանապարհով նոր Հայաստանում մրցութային գործընթացով շահել են աշխատանքներ, բայց այսօր չեն իրականացնում աշխատանք: Վերջին 20 օրվա ընթացքում անգամ սկսած աշխատանքները դադարեցրել են, որպեսզի մենք Հայաստանում այս ընթացքում շինարարություն չտեսնենք, շարունակենք տեսնել իրենց քանդած, չսարքած փոսերը: Նույնը վերաբերում է դեպի Քաջարան տանող ճանապարհին»:
Հռիփսիմե ՋԵԲԵՋՅԱՆ
