«Այդ ձայնագրությունից ակնհայտ է, թե ինչպես էր կապիտուլյանտը հսկայական բանակցային ժառանգությունը ձախողել, դիտավորությամբ կամ գուցե տգիտությամբ բերել պատերազմի, մեր կառուցողական դիրքերը, որոնց հետ համաձայնել էին համանախագահները, դարձրել ապակառուցողական, 44 օր խաբել ժողովրդին եւ թուրքին բերել-հասցրել Շուշի»,-լրագրողների հետ հանդիպմանն այսօր հայտարարեց «Պատիվ ունեմ» դաշինքի ներկայացուցիչ, պաշտպանության նախկին փոխնախարար Արտակ Զաքարյանը` անդրադառնալով Նիկոլ Փաշինյանի վերաբերյալ երրորդ նախագահ Սերժ Սարգսյանի հրապարակած ձայնագրությանը։
Արտակ Զաքարյանը նշեց․ «Կապիտուլյանտն ասում է, որ 2017թ․-ին Սերժ Սարգսյանը հայտարարել էր, որ բանակցությունները փակուղում են։ Այո, այդ ժամանակ բանակցությունները փակուղում էին, որովհետեւ Ադրբեջանն ապակառուցողական դաշտում էր։ ԵԱՀԿ ՄԽ-ն այդ իրավիճակը գնահատում էր որպես Ադրբեջանի ապակառուցողական գործունեություն, իսկ ՀՀ դիրքորոշումները պաշտպանվում էին համանախագահների կողմից։ Դա փաստում է նաեւ ձայնագրությունը՝ այն հատվածում, որ Ալիեւը հասկանում է՝ Արցախը չի լինելու Ադրբեջանի կազմում։ Այս ամենից հետո կապիտուլյանտը հանդգնում է խաբել ժողովրդին՝ ասելով, որ իբրեւ թե նախկինում այնքան վատ էր վիճակը, որ ինքը ստիպված գնար պատերազմի։ Ոչ, նա պատերազմը բերեց մեր գլխին»,-համոզմունք հայտնեց Արտակ Զաքարյանը։
Ինչ վերաբերում է Նիկոլ Փաշինյանի այն հայտարարությանը, թե իր կառավարման տարիներին ավելի շատ սպառազինություն է գնվել, քան նախորդ կառավարության օրոք, Արտակ Զաքարյանը հիշեցրեց, որ 2008-18թթ․ ՀՀ պետբյուջեից ռազմական կարիքների համար հատկացվել է 1 տրիլիոն 950 միլիարդ դրամ՝ գումարած ՌԴ-ի հետ վարկային համաձայնագիրը․ «Իսկ երկու տարում կապիտուլյանտները ռազմական կարիքներին հատկացրել են 603 միլիարդ դրամ։ Դե համեմատեք․ սուտն ու կեղծիքը հաշվարկների մեջ շատ արագ են բացահայտվում»։
Կարդացեք նաև
Լուիզա ՍՈՒՔԻԱՍՅԱՆ
