Սյունիքի մարզի Սիսիան համայնքում նախընտրական քարոզարշավի ժամանակ վարչապետի պաշտոնակատար Նիկոլ Փաշինյանն անդրադարձավ սահմանում տիրող իրավիճակին. «Մեր տեսակետը բազմիցս արտահայտել ենք: Մենք արձանագրում ենք, որ մեր դաշնակիցների աջակցությամբ սահմանային իրադրությունը պետք է լուծենք խաղաղ ճանապարհով, որովհետեւ դրա հնարավորությունը իրապես կա: Ադրբեջանի զորքերը աներկբայորեն պետք է դուրս գան Հայաստանի սահմաններից անդին եւ այս տեսակետը պաշտպանում է ողջ միջազգային հանրությունը: Մենք այսօր էլ մեր ռուս գործընկերների հետ ամենօրյա կապի մեջ ենք: Մեր պատկերացումը հետեւյալն է՝ սահմանային երկայնքով պետք է տեղակայվեն ռուս սահմանապահների ներկայացուցիչներ, նաեւ միջազգային դիտորդների հովանու ներքո պետք է տեղի ունենա Սոթքից Խոզնավար սահմանային կետերի ճշգրտում եւ սահմանների դելիմիտացիա, դեմարկացիա: Մինչ այդ մենք ասել ենք, որ զորքերը հայելային եղանակով պետք է վերադառնան մշտական տեղակայման վայրեր: Մենք հետեւողականորեն գնալու ենք այս ճանապարհով: Ես մտածում եմ եւ կասկածներ ունեմ, որ այս միջադեպերով փորձ է արվում ազդել նաեւ Հայաստանում ընտրությունների արդյունքների վրա»:
Հռիփսիմե ՋԵԲԵՋՅԱՆ
