«Ագրեսիվ հռետորաբանությունից բացի՝ քաղաքական ուժերի առաջնորդներն արդեն սկսել են կիրառել նաեւ գործիքներ, որոնք մարդկանց մոտ ասոցացվում են խփելու, ծեծելու, ջարդելու հետ։ Խոսքն, օրինակ, մուրճի մասին է։ Վաղը գուցե կացինով դուրս գան քարոզչական բեմահարթակ եւ կփորձեն կացինով ինչ-որ բան բացատրել ժողովրդին»,-նախընտրական քարոզարշավի ժամանակ այսօր լրագրողների հետ ճեպազրույցում հայտարարեց «Լուսավոր Հայաստան» կուսակցության պատգամավորի թեկնածու Անի Սամսոնյանը։
«Դա անթույլատրելի է։ Որքան հնարավոր է՝ մենք ջանք ենք գործադրում, որպեսզի մարդկանց ագրեսիվությունը հնարավորինս մեղմենք, հաշտության բերենք, սակայն այդ քաղաքական առաջնորդները գնալով ավելի պատկերավոր ձեւով են ժողովրդին ցույց տալիս, թե ինչ կանեն իրենք, եթե իշխանություն ստանան։ Սա մարդկանց համար ազդակ պետք է լինի, որ կառուցողական միջավայրը խարխլող քաղաքական առաջնորդները չեն կարող ստանալ ժողովրդի վստահության քվեն»,-նշեց Անի Սամսոնյանը։
Լրագրողներից մեկը հետաքրքրվեց՝ եթե դուք ընտրելիս լինեիք, ի՞նչ գործիչ կընտրեիք։ «Մեր գործիքը բանավոր մարդկային լեզուն է, որը ծառայեցնում ենք համերաշխություն տարածելուն»,-պատասխանեց Անի Սամսոնյանը։
Կարդացեք նաև
ԼՀԿ պատգամավորի թեկնածու Գեւորգ Գորգիսյանն էլ կատակեց՝ «սղոցը հարմար չի, երեւի հարթաչափը․․․մեր գործիքը շարունակում է մնալ գրիչը, գիտելիքը»։
Լուիզա ՍՈՒՔԻԱՍՅԱՆ
