«Բռնադատվածներն ապրել են անանձնական ուրախություններով, որոնք պայքարի են ելել մեզ՝ բոլորիս համար, հայրենակիցների եւ ընդհանրապես մարդկության համար: Բայց մեր իշխանությունները փորձում են մոռացության մատնել այս էջը, բայց կմոռացվեն նրանք, որոնք փորձում են մոռացության մատնել մեր հերոսներին»,-այսօր Բռնադատվածների հուշահամալիրի մոտ ասացին «Ազատ հայրենիք» դաշինքի անդամները: Հունիսի 14-ը Բռնադատվածների օրն է, եւ դաշինքի անդամների խոսքով, եկել էին քաղաքական բռնաճնշումներին իրենց գնահատականը տալու:
«Ազատ հայրենիք» դաշինքի անդամ Պարույր Հայրիկյանն ասաց, որ իրեն բախտ է վիճակվել լինել ամենաերկար բռնադատվածներից մեկը, իր օրոք իրավիճակն այլ էր. «Նրանց ճակատագրերը ողբերգական էին, նրանք ապրում էին այն ժամանակվա համար ընդունված համեստ կյանքով եւ նրանք իսկապես զոհեր էին: Սովետական Հայաստանի ստեղծումը, ընդհանարապես, Հայաստանի բռնազավթումը, դա ցեղասպանության շարունակությունն էր, եւ իմ մտքով չէր անցնում, որ մի այդպիսի դրվագի կառնչվենք 21-րդ դարի վերջին»:
Դաշինքի անդամները դժգոհություն հայտնեցին, որ իշխանությունները, մտավորականությունը «անփույթ են մոտեցում» են ցուցաբերում եւ չեն հիշում այդ օրը:
«Ազատ հայրենիք» դաշինքի ցուցակով առաջադրված պատգամավորի թեկնածու Հրանուշ Խառատյանն ասաց՝ մեր հերթափոխ իշխանությունները իրար հետեւից այս խնդիրն ուղղակի մոռացության մատնեցին. «Մոռացան, որ մենք խորհրդային քաղաքական ծանր անցյալ ունենք: Այդ անցյալի կենդանի վկաները նրանց համար միայն բեռ են»:
Կարդացեք նաև
Ըստ Հրանուշ Խառատյանի, անցյալը չգնահատելը քաղաքական բռնություն է. «Այսօր չափազանց անարդար վերաբերմունք կա բռնադատվածների ու նրանց ժառանգների նկատմամբ»: Տիկին Խառատյանն ասաց, որ հուշարձանի նախագծողը ճարտարապետ Ջիմ Թորոսյանն է, որի հայրը 1937 թվականին ձերբակալվել է եւ գնդակահարվել:
Պարույր Հայրիկյանն ասաց, որ երրորդ նախագահ Սերժ Սարգսյանի օրոք նախագիծ է եղել բռնադատվածների հիշատակին եկեղեցի կառուցել, նույնիսկ հուշատախտակ է տեղադրվել, սակայն, այդպես էլ մոռացության մատնվել:
Լուսինե ԲՈՒԴԱՂՅԱՆ
